Ազատ, բայց պատասխանատու լրատվամիջոցներին տված հարցազրույցում վարչապետ Տիգրան Սարգսյանը բառացիորեն հայտարարել է, թե «ամեն ինչ լավ կլիներ, եթե չունենայիք ՀՆԱ անկում և բարձր գնաճ»: «ՉԻ» - Այն, որ ֆիզիոլոգիական որոշ առանձնահատկությունների առկայության դեպքում մորաքրոջը կարելի է քեռի անվանել, բոլորին է հայտնի, բայց խնդիրը դա չէ: Տիգրան Սարգսյանը փաստորեն տնտեսությունն այս վիճակին հասցնելուց հետո դեռ իրեն իրավունք է վերապահում հեռուստաեթերից ծաղրել մարդկանց, և պատկերացրեք` անպատիժ է մնում: Հիմա պատկերացրեք` մեկին հանձնարարում եք, օրինակ, երկու հարկանի տուն կառուցել: Նա դրա փոխարեն կառուցում է մեկ հարկանի գոմ, որն էլ հենց բացման օրը փլվում է ներկաների գլխին, իսկ «շինարարը» հիմար ժպիտով քորում է գլուխը և հայտարարում, թե «ամեն ինչ լավ կլիներ, եթե շինությունը չփլվեր, աղյուսներն էլ մի քիչ այն կողմ թափվեին»: Նման շինարարին, հասկանալի է, տեղում մի լավ կքոթակեին, հետո կկալանավորեին և կստիպեին փոխհատուցել վնասը, բայց Տիգրան Սարգսյանի դեպքում ուրիշ է: Առայժմ ուրիշ: Թեև այսպես թե այնպես, հազիվ թե բանը քոթակով ավարտվի: