Երևանի քաղաքապետ Կարեն Կարապետյանը և «Տաշիր» գրուպ ընկերության նախագահ Սամվել Կարապետյանն այսօր համաձայնագիր են ստորագրել երկարաժամկետ համագործակցության  վերաբերյալ, որի շրջանակում նախատեսվում է լայանածավալ ներդրումային   ծրագրեր իրականացնել մայրաքաղաքի ենթակառուցվածքների զարգացման, զբոսաշրջության, կառուցապատման, հանգստի գոտիների ու  կանաչ տարածքների ստեղծման և մի շարք այլ ուղղություններով:  Շնորհակալություն հայտնելով հյուրերին համագործակցության առաջարկն ընդունելու  համար` Կարեն Կարապետյանը նշել է, որ քաղաքապետարանի և խոշոր բիզնեսի միջև ձևավորվող հարաբերությունները  սկզբունքորեն նոր որակ են  ստեղծում քաղաքի և քաղաքային տնտեսության կառավարման մեջ: «Մայրաքաղաքում գործարար միջավայրի բարելավման և ներդրումային միջոցների ներգրավման հետ կապված  այսօր լուրջ քայլեր են ձեռնարկվում»,- ասել է քաղաքապետը`  համոզմունք հայտնելով, որ քաղաքային տնտեսության առանձին  ոլորտներ, որոնք  բիզնես հետաքրքրություն են ներկայացնում, կարող են ավելի արդյունավետ  կառավարվել մասնավոր հատվածի կողմից: «Այս պարագայում քաղաքային բյուջեի հիմնական մասը կուղղվի սոցիալական և բարեկարգման ծրագրերին»,-ընդգծել է նա: Ողջունելով քաղաքային իշխանության նոր մոտեցումը` Սամվել Կարապետյանն իր հերթին նշել է, որ «Տաշիր» գրուպը քաղաքապետարանին համարում է   երկարաժամկետ  և հուսալի  գործընկեր: Սամվել Կարապետյանն ընդգծել է,  որ ընկերության կողմից իրականացվող ծրագրերը բոլորովին նոր պայմաններ կստեղծեն մայրաքաղաքի բնակչության հարմարավետության և հանգստի կազմակերպման առումով: Ստորագրված համաձայնագրով  նախատեսվում է Երևանի կենտրոնում կառուցել միջազգային չափանիշներին համապատասխան հյուրանոց, ավարտին հասցնել «Դալմա Գարդեն» առևտրի ու ժամանցային համալիրի շինարարությունը, առևտրային ժամանակակից  կենտրոններ ստեղծել Հյուսիսային պողոտայում, վերակառուցել և արդիականացնել Երևանի կրկեսը, հանգստի  գոտիներ ու զբոսայգիներ հիմնել քաղաքի տարբեր հատվածներում: Ինչպես տեղեկացնում է քաղաքապետարանի տեղեկատվության և հասարակայնության հետ կապերի վարչությունը, ծրագրերի շրջանակում ընդհանուր առմամբ նախատեսվում է ավելի քան 600 նոր աշխատատեղերի ստեղծում` սպասարկման ոլորտում։