ԲՀԿ խմբակցության պատգամավոր Վահագն Մախսուդյանը «Հետքի» հետ զրույցում ասաց, թե անձնական զբաղվածության պատճառով չի հետեւում Ազատության հրապարակում ՀԱԿ-ի շուրջօրյա հանրահավաքներին, բայց լսել է դրանց մասին:

Անդրադառնալով տարածքում փակ զուգարանների խնդրին` ասաց. «Այ մարդ, ինչի մասին է խոսքը, մեր ժողովուրդն է, հանրահավաք են անում…Ընդհանրապես մեր քաղաքում զուգարանների կարիք շատ կա, հասարակական զուգարաններ չկան, իսկ եղածներն էլ քիչ են»:

Դիտարկմանը, թե Ազատության հրապարակում զուգարաններ կան, սակայն հանրահավաքի մասնակիցների համար փակ են, Վահագն Մախսուդյանն ասաց, թե ինքն այդ մասին չգիտի, քանի որ Ազատության հրապարակի զուգարաններից չի օգտվել:

«Առիթ է եղել, ակնարկել եմ, որ պիտի վճարովի զուգարաններ լինեն հանրապետության ողջ տարածքում: Ճանապարհներին սանհանգույցներ չունենք, իսկ դա շատ վատ է, օրինակ, գնում ենք Գառնի, Գեղարդ, մարդիկ տեղ են ման գալիս անտառներում, որ իրենց կարիքները հոգան: Եկեք այսօր դա չկապենք հանրահավաքների հետ»,-ասում է պատգամավորը:

Վահագն Մախսուդյանը, ընդդիմության ներկայացուցիչներին խորհուրդ տվեց օգտվել սրճարանների զուգարաններից: «Այնտեղ, եթե զուգարան լինի, պիտի վճարովի լինի, դա էլ մասնավորին է, ինչի՞ պիտի իր տուալետը փակի: Ընդհակառակը` պիտի ուզի ընդեղ ցույց լինի, տուալետ հաճախողների քանակն էլ շատ լինի»,-հավելեց ԲՀԿ-ական պատգամավորը: