Այսօր ԱԳ նախարար Էդվարդ Նալբանդյանն ընդունեց Քուվեյթի ֆինանսների նախարար Մուստաֆա Ջասեմ Ալ-Շամալիին, որն Երեւան է ժամանել հայ-քուվեյթյան միջկառավարական հանձնաժողովի անդրանիկ նիստին մասնակցելու նպատակով:

Արտգործնախարար Նալբանդյանը նշեց, որ 2009 թ. ՀՀ Նախագահ Սերժ Սարգսյանի Քուվեյթ կատարած պետական այցելությունից հետո երկու երկրների միջեւ հարաբերությունները դինամիկ կերպով զարգանում են, իսկ միջկառավարական հանձնաժողովի ձեւավորումը նոր լիցք կհաղորդի երկկողմ համագործակցության զարգացմանը:

Մուստաֆա Ջասեմ Ալ-Շամալին ընդգծեց, որ անցյալ տարի Քուվեյթում ՀՀ դեսպանության հիմնադրումից ի վեր համագործակցությունը նոր թափ է ստացել, եւ Քուվեյթի իշխանությունները նպատակադրված են առավել խորացնելու փոխշահավետ համագործակցությունն ու այդ նպատակով որոշում է կայացվել Երեւանում բացել Քուվեյթի դեսպանություն: 

Հանդիպմանը քննարկվեցին երկու երկրների միջեւ տնտեսական համագործակցության ընդլայնման ուղիները եւ առկա ներուժի արդյունավետ օգտագործմանն առնչվող հարցեր:

ՀՀ ԱԳ նախարարն ու Քուվեյթի ֆինանսների նախարարը մտքեր փոխանակեցին նաեւ միջազգային եւ տարածաշրջանային հարցերի շուրջ: Այս մասին հայտնում են ԱԳՆ մամուլի ծառայությունից: