«Պատկերացրու աշխարհը, որտեղ տեղեկատվական տեխնոլոգիաներն օգնում են լուծել աշխարհի հրատապ խնդիրները» կարգախոսի ներքո Հայաստանում մեկնարկում է «Երևակայության գավաթ» մրցույթը, որը իրականացվում է «Մայքրոսոֆթ Հայաստան» ընկերության և «Ձեռնարկությունների Ինկուբատոր Հիմնադրամի» նախաձեռնությամբ: Մրցույթի նպատակն է  խրախուսել ուսանողներին օգտագործել իրենց երևակայությունը` տեխնոլոգիաներով հագեցած աշխարհը բարելավելու համար: Ինչպես նաև ստեղծագործական հմտությունների, տեխնոլոգիաների գործածման շնորհիվ  նոր ուղիներ բացահայտել, որոնք ուղղված կլինեն աշխարհի հրատապ խնդիրներին: Արդյունքում` հենց ուսանողները կդառնան  ամենախոշոր  նորարարություններից ու ընկերություններից մի քանիսի ստեղծողը: Հարկ է նշել, որ ՄԱԿ-ը իր «Հազարամյակի մարտահրավերներ» ծրագրում շեշտել է արդի աշխարհի ամենահրատապ խնդիրներից մի քանիսը` աղքատության նվազեցումից և ՄԻԱՎ/ՁԻԱՀ-ի տարածման կանխումից մինչև համընդհանուր առաջնային կրթության ապահովումը: Այս ամենն ի նկատի ունենալով` «Երևակայության գավաթը» կոչ է անում ծրագրավորողներին և տեղեկատվական տեխնոլոգների մասնագետներին անդրադառնալ այս մարտահրավերներին և օգտագործել «Հազարամյակի մարտահրավերների» բարձրացրած խնդիրները որպես ներշնչանքի աղբյուր: Հայաստանի «Երևակայության գավաթ» մրցույթի  մասնակցության  հայտերն ընդունվում են մինչև ս.թ. ապրիլի 25-ը: Մրցույթի կանոններին ծանոթանալու համար այցելեք www.imaginecup.am կայքը: