ՍԻՄ նախագահ Հայկ Բաբուխանյանը դատի է տվել Report.am կայքէջին և լրագրող վերլուծաբան Էդիկ Անդրեասյանին: Պատճառը վերոնշյալ կայքէջում նախորդ տարվա սեպտեմբերին հրապարակված, Էդիկ Անդրեասյանի ««Իրավունքի» իրավունքը Հայկ Բաբուխանյանի սրի ծայրին է» հոդվածն է: Այդ հոդվածը, ըստ հայցվորների, «պարունակում է այնպիսի արտահայտություններ, որոնք վիրավորական են ու զրպարտող: Նրանց համոզմամբ` հոդվածում տեղ գտած արտահայտությունները ստույգ ու ճշմարտացի չեն: «Դեռ ավելին, ուսումնասիրելով հոդվածը, դրանում պարունակող արտահայտությունները և այլ մտքերը` ակնհայտ է, որ այդ հոդվածը, ինչպես իրավական առումով, այնպես էլ փաստական առումով ճշմարտությանը և իրականությանը չի համապատասխանում»,- նշվում է հայցադիմումի մեջ: Report.am-ը հայտնում է, որ բացի հերքումից և հրապարակային ներողությունից` Հայկ Բաբուխանյանը լրատվամիջոցից և հոդվածագրից պահանջում է երկուական միլիոն դրամ: Նախնական դատական նիստը կկայանա Երևանի Կենտրոն և Նորք Մարաշ վարչական շրջանների ընդհանուր իրավասության դատարանում մարտի 23-ին: