Այսօր՝ Ազգային ժողով-կառավարություն հարց ու պատասխանի ժամին, ՀՅԴ խմբակցության պատգամավոր Վահան Հովհաննիսյանը հարց ուղղեց կառավարությանը, ինչից հետո սփյուռքի նախարար Հրանուշ Հակոբյանը տեղը չէր գտնում:

Վահան Հովհաննիսյանն ընթերցեց սփյուռքի նախարարության կայքէջից մի գրություն, որը լրատվամիջոցներից մեկի հրապարակած հոդվածն է եղել: Ըստ այդմ, «Հայաստանի անկախության 20-ամյակի կապակցությամբ մեկնարկել է «Հայաստան-3500» խորագիրը կրող ծրագիրը: Նախագծի նպատակն է աջակցել արևմտյան երկրներում բնակվող 3 500 հայերի վերաբնակեցմանը Հայաստանում և Լեռնային Ղարաբաղում, հաղորդում է «Հայաստան - 3500» նախաձեռնող խումբը: Ծրագրի նախաձեռնողները վստահ են, որ դրա իրագործումը կնպաստի Հայաստանի տնտեսության զարգացմանը: Նախագծի կազմակերպիչների հաշվարկներով` հայերը միջինը 50-հազարական դոլար կբերեն իրենց հետ, այդ գումարը նրանք կծախսեն բնակարանի ձեռքբերման համար կամ կներդնեն բիզնեսում»:

Վահան Հովհաննիսյանը հետաքրքրվեց, թե ովքեր են այդ նախաձեռնող խմբի անդամները, եւ դա ինչ ծրագիր է: Հետո հիշեցրեց իրաքահայերի ներգաղթը, որից հետո շատերը, բնակարան կամ իրենց համար անհրաժեշտ պայմաններ չստանալով, ի վերջո, լքեցին Հայաստանը:

Ամբիոնին մոտեցավ եւ հարցին պատասխանեց ՀՀ  սփյուռքի նախարար Հրանուշ Հակոբյանը: Նա այնքան հուզված էր, որ խոսելիս շունչը կտրվում էր: Նախարարը նշեց, թե պետք չէ հավատալ մամուլի ամեն մի հրապարակմանը, իսկ երբ Վահան Հովհաննիսյանն ասաց, որ այդ հրապարակումը վերցրել են նախարարության կայքից, Հրանուշ Հակոբյանն արդարացավ, թե Հայաստանում չի եղել, եւ չգիտի այդ մասին՝ խոստանալով աշխատակիցներից ճշտել, թե դա ինչ է:

«Երեւի հայրենադարձության մասին նյութ է եղել, աշխատակիցները տեղադրել են կայքում»,- հավելեց նախարարը եւ թվարկեց իրենց աշխատանքների ու ծրագրերի արդյունքները:

Նստելով իր տեղը` մի քանի րոպե անց նախարարը նախ մոտեցավ վարչապետ Տիգրան Սարգսյանին, նրա հետ մի քանի րոպե խոսելուց հետո մոտեցավ նաեւ Վահան Հովհաննիսյանին:

Հրանուշ Հակոբյանն այսօր հեռացավ նիստի ավարտից 10 րոպե շուտ, թեպետ սովորաբար մնում էր մինչև ավարտը: