Վերջերս հետաքրքիր փաստ արձանագրվեց Հայաստանի ռոբոտների բաց առաջնության (ԱրմՌոբոտիքս) շրջանակներում, ինչը, ենթադրում ենք, կուրախացնի հասարակությանը: Դպրոցականները սկսել են շատ ակտիվ զբաղվել ռոբոտաշինությամբ, և դա արդեն տալիս է իր պտուղները: Այս փաստը ցույց է տալիս, որ միայն սերիալները և խաղերը չեն, որ հետաքրքրում են երեխաներին: Հարցն այն է, թե նրանց ինչ ճանապարհով ենք ուղղորդում, ինչ հնարավորություններ ենք ստեղծում նրանց համար: Այժմ յուրաքանչյուր ԱրմՌոբոտիքսի մրցույթի մասնակցում է դպրոցականներից կազմված թիմ և արձանագրում հաջողություններ: Լավագույն օրինակն է «Մխիթար Սեբաստացի» կրթահամալիրի «Առվակ» թիմի 2-րդ տեղի հաղթանակը «Գծին հետևող ռոբոտ» մրցույթում: Նման փոփոխությունը պայմանավորված է դպրոցներում ռոբոտաշինության խմբակների ձևավորմամբ: Ներկայումս ռոբոտաշինության խմբակներ գործում են «Մխիթար Սեբաստացի» կրթահամալիրում, «Քվանտ» և Պոլիտեխնիկի հենակետային վարժարաններում, իսկ Օհանյան վարժարանում և «Անանիա Շիրակացի» կրթահամալիրում խմբակների կազմավորման աշխատանքներ են կատարվում: Երևանի քաղաքապետ Կարեն Կարապետյանի հետ ունեցած նախնական պայմանավորվածության համաձայն` նախատեսվում է նաև երևանյան 50 դպրոցներում բացել տեղեկատվական տեխնոլոգիաների (ՏՏ) խմբակներ, որոնց մի մասը նվիրված կլինի ռոբոտաշինությանը: Խմբակները ստեղծվում են Ինֆորմացիոն տեխնոլոգիաների ձեռնարկությունների միության (ԻՏՁՄ), «Նեյշնլ ինսթրումենթսի» և այլ ընկերությունների աջակցությամբ, իսկ գաղափարն առաջացել է դեռևս 2009 թ., երբ ռոբոտների մրցույթներից հետո ծնողները հետաքրքրվել են, թե որտեղ իրենց դպրոցական երեխաները կարող են սովորել ռոբոտներ պատրաստել: Այս մասին հայտնում է ԻՏՁՄ-ն: