«Ժառանգություն» կուսակցության և խորհրդարանական խմբակցության դեմ Հայաստանի Հանրապետության իշխանությունների չդադարող ապօրինությունների վերաբերյալ Նամակ-իրազեկում Սույն թվականի փետրվար ամսից «Ժառանգություն» կուսակցության օրինական գործունեության հանդեպ կառավարության կողմից խիստ սահմանափակումների կիրառումը  և պաշտոնապես  դրսևորվող հալածանքները ձեռք են բերել նոր որակ: Հայաստանում քաղաքական միջավայրը գրեթե բացառում է քննարկումները և բանավեճերը`   առանց հալածանքների և վախի առկայության: 2006թ. «ժառանգություն» կուսակցության համակարգիչներից կողոպտված տեղեկատվության  փաստի առթիվ հարուցվել էր քրեական գործ, որը մինչ օրս կասեցված է, քանի որ, համաձայն պաշտոնական բացատրության, հնարավոր չէ բացահայտել կողոպտիչներին: 2007թ. թռուցիկներ բաժանելու ժամանակ «ժառանգություն» կուսակցության անդամ, ԱԺ պատգամավոր Զարուհի Փոստանջյանը ենթարկվել է բռնության ոստիկանների կողմից: Հարձակման փաստի առթիվ հարուցվել է քրեական գործ, որը մինչ օրս կասեցված է, քանի որ, համաձայն պաշտոնական բացատրության, հնարավոր չէ բացահայտել հարձակվողներին: 2008թ. մարտի 1-ի դեպքերի ժամանակ «ժառանգություն» կուսակցության անդամ, ԱԺ պատգամավոր Արմեն Մարտիրոսյանին դանակահարել են: Փաստի առթիվ հարուցվել է քրեական գործ, որը մինչ օրս կասեցված է, քանի որ, համաձայն պաշտոնական բացատրության, հնարավոր չէ բացահայտել դանակահարողին: 2010թ. գործող իշխանությունները, չհանդուրժելով ԵԽԽՎ-ում Հայաստանի պատվիրակության անդամ Զարուհի Փոստանջյանի սուր քննադատությունները` ՙԺառանգության՚ ներկայացուցչին պատվիրակության հիմնական կազմից տեղափոխում են փոխարինող կազմ և Վեհաժողովի առաջիկա նստաշրջանին ֆինանսների սղության պատճառաբանությամբ չեն ներառում Ստրասբուրգ գործուղվող պատվիրակների թվում: 2011թ. փետրվարին «Ժառանգությունը» բողոքի մի քանի ցույցեր անցկացնելով Վանաձոր, Նոյեմբերյան, Ստեփանավան քաղաքներում` փետրվարի 17-ին հանրապետության երկրորդ քաղաք Գյումրիում քաղաքացիների և ԶԼՄ-ների աջակցությամբ 12-ժամյա պայքարի հետևանքով հաղթահարում է Գյումրիի գլխավոր փողոցը արգելափակած ոստիկանների հանցավոր գործողությունը: 2011թ. փետրվարի 18-ին գլխավոր դատախազությունը քրեական գործ է հարուցում Զարուհի Փոստանջյանի եղբոր` Տիգրան Փոստանջյանի դեմ: Իշխանությունը կուսակցության դեմ փաստորեն գործում է նաև քաղաքական պատանդ վերցնելու միջոցով, ով երբևէ չի զբաղվել քաղաքականությամբ, ունի երկու մանկահասակ որդի, բարեպաշտ և օրինավոր բնութագիր (Տիգրան Փոստանջյանի դեմ հարուցված քրեական գործի շինծու լինելը, արտառոց էությունն ու աղաղակող ապօրինությունները շարադրված են կից ներկայացվող «ՏԵՂԵԿԱՆՔՈՒՄ»): 2011թ. փետրվարի 28-ին Երևանի քաղաքապետարանի դիմաց անցկացվող բողոքի ցույցին զորակցելիս «Ժառանգության» պատգամավորներ Ստյոպա Սաֆարյանը, Զարուհի Փոստանջյանը և պիկետի մասնակիցները ուղղակի հարձակման ենթարկվեցին ոստիկանության և հատուկջոկատայինների կողմից: Ապօրինի ուժ գործադրած և պատգամավորների անձեռնմխելիությունը խախտած որևէ ոստիկան պատասխանատվության չենթարկվեց: 2011թ. մարտի 3-ին ոստիկանները ՀՀ Սահմանադրության և օրենքների կոպիտ ոտնահարմամբ արգելեցին քաղաքացիների բողոքի գործողության անցկացումը ՀՀ կառավարության շենքի առջև: Ոստիկանները, նաև խախտելով պիկետին աջակցող պատգամավորների անձեռնմխելիությունը, Հանրապետության հրապարակի կենտրոնում հավաքված «Ժառանգություն» խմբակցության անդամներ Անահիտ Բախշյանին, Զարուհի Փոստանջյանին, Արմեն Մարտիրոսյանին և երկու տասնյակի չափ բողոքող քաղաքացիներին, չնայած բազմաթիվ լրագրողների ներկայությանը, բիրտ ուժի կիրառմամբ հեռացրին նշված վայրից: Անահիտ Բախշյանի ինքնազգացողությունը կտրուկ վատացավ, և բժշկական օգնություն ցուցաբերվեց: Նույն օրը ՙԺառանգությունը՚ հաղորդում ներկայացրեց հանցագործության մասին, որին մինչ օրս ընթացք չի տրվել (Կից ներկայացվում է առաջին հաղորդումը): Նույն օրը ոստիկանությունը ներկայացրեց երկու պաշտոնական հաղորդագրություն, որոնցով իրավաչափ էին որակվել ոստիկանների գործողությունները, և սադրիչ` «Ժառանգության» պատգամավորները: «Ժառանգությունը»  ՀՀ Հատուկ քննչական ծառայությանը, ՀՀ գլխավոր դատախազին, ՀՀ կառավարությանն առընթեր ոստիկանության պետին և ՀՀ մարդու իրավունքների պաշտպանին մարտի 9-ին հաղորդում է ներկայացրել հանցագործության մասին` պահանջելով քրեական գործ հարուցել օրինազանց բոլոր ոստիկանների նկատմամբ (Կից ներկայացվում է երկրորդ հաղորդումը): Նույն օրը Հատուկ քննչական ծառայությունը «Ժառանգության» կողմից «Հաղորդում հանցագործության մասին» ներկայացնելուց ժամեր անց իր պաշտոնական կայք-էջում տեղադրում է իր կողմից մարտի 4-ին հարուցված, բայց միայն մարտի 9-ին հրապարակված քրեական գործի մասին տեղեկատվությունը` մարտի 3-ին Հանրապետության հրապարակում ոստիկանների դեմ կյանքին չսպառնացող բռնություն կիրառելու հիմքով: Մարտի 14-ին Հատուկ քննչական ծառայությունը Արմեն Մարտիրոսյանին, իսկ մարտի 15-ին` Զարուհի Փոստանջյանին առանց կարգավիճակը նշելու պաշտոնական ծանուցման միջոցով հրավիրում են հարցաքննության` ոստիկանների դեմ բռնություն կիրառելու վերաբերյալ ՀՔԾ-ի կողմից հարուցված քրեական գործի շրջանակներում: Մարտի 15-ից, «Ժառանգություն» կուսակցության վարչության նախագահ, ԱԺ պատգամավոր, ՀՀ Արտաքին գործերի առաջին նախարար, Րաֆֆի Հովհաննիսյանը հայտարարել է հացադուլ Երևանի «Ազատության» հրապարակում:  Ոստիկանության աշխատակիցներն արգելել են հացադուլի մեջ գտնվող Րաֆֆի Հովհաննիսյանին օգտվել հացադուլի ընթացքում հանգստի և առողջությունը վտանգի չենթարկելու անհրաժեշտ պայմաններից: Արդեն իններորդ օրն է, ինչ Րաֆֆի Հովհաննիսյանը իր հացադուլը անցկացնում է բաց երկնքի տակ, քանի որ ոստիկանության աշխատակիցները առանց օրինական հիմնավորման բռնի ուժի գործադրմամբ արգելել են վրանի տեղադրումը: Չկարողանալով «Ժառանգությանը» շեղել իր ժողովրդավարակերտ ուղուց` քաղաքական բանտարկյալներ պահող իշխանությունը կուսակցության դեմ սկսեց գործել նաև քաղաքական պատանդ վերցնելու, պատգամավորների մասնակցությամբ անցած բողոքի գործողությունների վերաբերյալ քրեական գործեր հարուցելու և դրանք դամոկլյան սրի տեղ գործադրելու մեթոդներով: Հայաստանի ժողովրդավարական ուժերի, հասարակության և Եվրոպայի իրապես ժողովրդավարների դեմ նետված այս մարտահրավերների շուտափույթ հաղթահարումը չափազանց օրախնդիր է դարձել: Հարկ ենք համարում հիշեցնել, որ մինչ օրս չբացահայտված են մնում հատկապես վերջին տասնամյակի ընթացքում ընդդիմադիր ակտիվիստների, գործիչների, անկախ լրագրողների հանդեպ կատարված բոլոր հանցագործությունները, այդ թվում` մարտի 1-ի տաս սպանություն կատարողները: Բոլորիդ ահազանգում եմ իշխանության այս հերթական աննախադեպ ապօրինությունների մասին` ակնկալելով և պահանջելով ձեր լիազորությունների շրջանակներում համապատասխան վերաբերմունք և գնահատական: Զարուհի Փոստանջյան ԵԽԽՎ անդամ ԵԺԿ/Հայաստան Ստյոպա Սաֆարյան «Ժառանգություն» կուսակցության վարչության անդամ ՀՀ ԱԺ «Ժառանգություն» խմբակցության ղեկավար