«Արժանապատիվ տրանսպորտ» քաղաքացիական նախաձեռնությունը տեղեկացնում է, որ այսօր առավոտից  չեն գործում Վանաձորից, Սեւանից եւ Աբովյանից  դեպի Երեւան եկող երթուղային գծերը:

Նախաձեռնության  Վանաձորի ակտիվիստ –լրագրողներից մեկը տեղեկացնում է, որ այս պահին Վանաձորի ավտոկայանում շուրջ 80 մարդ է հավաքված, ովքեր չեն կարողանում հասնել  Երեւան: Քաղաքացիներին տեղեկացրել են` գազելները  չեն գործում այն պատճառով, որ չեն վերադարձել Երեւանից: Ուղեւորները  մայրաքաղաք կարողանում են տեղափոխվել  միայն տաքսիներով, որոնք այս օրերին բարձրացնում են երթեւեկության գինը:

Իսկ Սեւանի մեր ակտիվիստը փոխանցնում է, որ գազելները Երեւան են տեղափոխվում ոչ սովորական երթուղով եւ չեն կարողանում մուտք գործել մայրաքաղաք:

Աբովյանի կանգառներում, ինչպես փոխանցում  է նախաձեռնության մեկ այլ ակտիվիստ, այս պահին խառնաշփոթ է, եւ մարդիկ չգիտեն` ինչով հասնեն Երեւան:

Հիշեցնենք, որ հոկտեմբերի 4-ին  «Արժանապատիվ տրանսպորտ» քաղաքացիական նախաձեռնության ակցիայի ժամանակ ՀՀ տրանսպորտի եւ կապի նախարարության մամուլի խոսնակ Պետրոս Դեմիրճյանը տեղեկացրեց, որ վերջին օրերին միջմարզային տրանսպորտի  երթեւեկության խախտումների վերաբերյալ կազմել են արձանագրություններ`հիմնվելով նաեւ «Արժանապտիվ տրանսպորտ»-ի անցկացրած մոնիթորինգի արդյունքների վրա:
Ներկայացնում ենք հատված արձանագրությունից.

«Վերջին երկու օրերի ընթացքում ՀՀ տրանսպորտային տեսչության կողմից կազմվել է թվով 5 արձանագրություն` Շիրակի /2/, Լոռու /1/, Արմավիրի /1/ և Արագածոտնի /1/ միջմարզային երթուղիները սպասարկող ընկերությունների` համապատասխանաբար, «Տրանս-Ակնթարթ» ՍՊԸ-ի, «Ոսկեթև» ՍՊԸ-ի, «ՎարՌուբ» ՍՊԸ-ի և «Դավթյանտրանս» ՍՊԸ-ի նկատմամբ»:

Երեկ  նախաձեռնության ակտիվիստներից մեկն ահազանգել է ՀՀ  տրանսպորտի եւ կապի նախարություն եւ տեղյակ պահել մասնավորապես Աբովյան-Երեւան երթուղու չգործելու մասին: Նախարարության  մամուլի խոսնակը պատասխանել է, որ  կհանձնարարվի արձանագրություն կազմել տվյալ խախտման վերաբերյալ, սակայն, իրավիճակն ավելի է բարդացել:

ՀՀ տրանսպորտի եւ կապի նախարարության մամուլի խոսնակ Պետրոս Դեմիրճյանը քիչ առաջ զանգահարեց`նշելով, որ  Վանաձոր, Աբովյան եւ Սեւան ուղղություններով արված մեր ահազանգին ընթացք է տրվել, եւ երկու-երեք օրում  կկազմվեն արձանագրություններ, եւ երկուշաբթի օրը տեղեկատվություն կտրամադրեն տուգանված  ընկերությունների մասին:
Նշենք, որ «Արժանապատիվ տրանսպորտը»  դեռեւս 4 օր առաջ էր ահազանգել նախարարությանը  մարզեր-Երեւան երթուղիների կաթվածահար վիճակի մասին, սակայն այս օրերի ընթացքում նշված ուղղություններով որեւէ փոփոխություն   չի կատարվել:

«Արժանապատիվ տրանսպորտ» քաղաքացիական նախաձեռնություն