Այսօր տուբերկուլյոզի դեմ պայքարի համաշխարհային օրն Է: 1882 թվականի մարտի 24-ին գերմանացի մանրէաբան Ռոբերտ Կոխը հայտարարեց տուբերկուլյոզի հարուցչի հայտնաբերման մասին։ Դրանից 11 տարի անց` 1993 թվականից ի վեր մարտի 24-ը ողջ աշխարհում նշվում է որպես Տուբերկուլոզի դեմ պայքարի համաշխարհային օր: Ամեն տարի 1.6 միլիոն մարդ է մահանում տուբերկուլյոզից, որոնց մեծամասնությունը զարգացող երկրների բնակիչներ են: ՀՀ առողջապահության նախարարությունը նշում է, որ Հայաստանի Հանրապետությունում տուբերկուլոզի դեմ պայքարն իրականացվում է ՀՀ կառավարության 2006 թվականի դեկտեմբերի 28-ի թիվ 52 արձանագրային որոշմամբ հաստատված «2007-2015թթ. Տուբերկուլյոզի դեմ պայքարի ազգային ծրագրի» շրջանակներում, որի հիմքում ընկած են Առողջապահության համաշխարհային կազմակերպության մոտեցումները և նպատակները: Վերջերս «Հետքը» հոդվածաշար տպագրեց Հայաստանում տուբեկուլյոզի ծրագրերի վերաբերյալ, ինչից հետո աշխատանքից ազատվեց Տուբերկուլյոզի դեմ պայքարի ազգային ծրագրի գրասենյակի ղեկավար Մարգարիտա Բալասանյանը: Գրասենյակն այժմ նոր ղեկավար ունի` Արմեն Հայրապետյան: Այսօր «Հենարան» ակումբում նախատեսված էր «Հակատուբերկուլյոզային դիսպանսեր» ՓԲԸ ստացիոնար բաժնի վարիչ Կատարինա Գյուլբայազյանի ասուլիսը, որը, սակայն, չկայացավ: Տուբերկուլոզի դեմ պայքարում ՀՀ առողջապահության նախարարությունը համագործակցում է միջազգային մի շարք կազմակերպությունների` Կարմիր խաչի միջազգային կոմիտեի, Բժիշկներ առանց սահմանների /Ֆրանսիա/, ԱՀԿ, Գերմանական ԳՈՊԱ-էպոս, ԱՄՔՈՐ, ՄԻԱՎ/ՁԻԱՀ-ի, Տուբերկուլոզի և Մալարիայի դեմ պայքարի Գլոբալ հիմնադրամի հետ: Նշենք, որ «Հետքի» հոդվածներից հետո աշխատանքից ազատվել է նաև «Գլոբալ հիմնադրամ»-ի հայաստանյան ծրագրերի համակարգող խմբի ղեկավար Օվսաննա Նաջարյանը: Նրան մարտի 22-ից փոխարինում է Հասմիկ Հարությունյանը: Հանրապետությունում տուբերկուլոզով հիվանդների հայտնաբերումը, բուժումը և հետագա վերահսկումն իրականացվում է պետական պատվերի շրջանակներում և լիովին անվճար է: Ժամանակին և ճիշտ կազմակերպված բուժման դեպքում տուբերկուլոզը լիարժեք բուժվում է: Չբուժվելու դեպքում վարակիչ հիվանդը 1 տարվա ընթացքում վարակում է 10-15 մարդու /առաջին հերթին ընտանիքի անդամներին/, որոնց 10%-ը հետագայում հիվանդանում է տուբերկուլոզով: Չբուժված հիվանդների 50%-ը մահանում է առաջին 5 տարվա ընթացքում, 25%-ի մոտ կայուն իմուն համակարգի շնորհիվ տեղի է ունենում սպոնտան առողջացում, մնացած 25%-ի մոտ զարգանում է խրոնիկ տուբերկուլոզ: Տուբերկուլոզի խնդրին լուծում տալու նպատակով Առողջապահության համաշխարհային կազմակերպությունը մշակել է տուբերկուլոզի բուժման DOTS /Directly Observed Treatment Short-course - Ուղղակիորեն հսկվող բուժման կարճաժամկետ կուրս/ ռազմավարություն, որն արդյունավետ կերպով կիրառվում է աշխարհի գրեթե բոլոր, այդ թվում նաև զարգացած շուկայական տնտեսություն ունեցող, երկրներում: 1995 թվականից սկսած աշխարհի գրեթե 184 երկրում այս ռազմավարությամբ բուժվել է ավելի քան 31,8 մլն մարդ: