Միջազգային ոստիկանական ասոցիացիայի հայաստանյան ներկայացուցչությունը, ի դեմս նախագահ Գ. Սարգսյանի, հայտնում է իր մտահոգությունը վերջին շրջանում հասարակության որոշ շերտերում ոստիկանության հանդեպ ծագած լարվածության վերաբերյալ: Ո՞վ է այսօր ոստիկանը: Ի՞նչ տեղ է զբաղեցնում մեր հասարակության մեջ: Ի՞նչ հոգածության է արժանանում կառավարության կողմից: Հարցեր, որոնց պատասխանները անպայման պիտի տրվեն... Ոստիկանը մարդ է և քաղաքացի, ում կյանքը ոչ թե իրեն ու ընտանիքին, այլ հասարակությանն ու օրենքի պահպանմանն է պատկանում: Քչերը գիտեն, թե ինչ է նշանակում գիշերվա ցանկացած ժամի տագնապալի լուրի սպասել: Քչերն են պատկերացնում, թե ինչ է նշանակում ճանապարհել ամուսնուն, հորը, եղբորը աշխատանքի և չիմանալ, թե օրն ինչ ավարտ կունենա... Եվ այս ամենի հետ մեկտեղ` հանիրավի բացասական վերաբերմունք: Կար ժամանակ, երբ «ի՞նչ ես ուզում դառնալ» հարցին փոքրիկները հպարտությամբ պատասխանում էին` ոստիկան: Եվ իրոք, ուսադիր կրելը պատիվ է, ինչն այսօր ոմանք չեն գիտակցում: Ոստիկանը նա է, ով 90-ականների սկզբին թողեց ընտանիքը և գնաց հայրենիքի սահմանները պաշտպանելու: Նա է, ով կանգնեց Հայոց բանակի ակունքներում և հիմքը դարձավ այդ բանակի: Նա է, ով 90-ականների սկզբին զսպեց գլուխ բարձրացրած հանցագործ տարրերին: Սխրագործությո՞ւն է: Անպայման: Եվ` պատմական սխրագործություն: Արցախյան պատերազմի տարիներին ոստիկանը մարտնչել է բոլոր ռազմաճակատներում, բոլոր թեժ կետերում: Միայն «Կոլցո» գործողության ընթացքում ոստիկանությունը տվեց 16 զոհ, 60 վիրավոր, 12 անհայտ կորած ունեցանք, 72-ը գերեվարվեց... Եվ այդ թանկ կորուստների գնով կարողացանք տապալել թշնամու հրեշավոր ծրագրերը. սահմանային գյուղերն ու քաղաքները զերծ մնացին հիմնահատակ ավերումից, մեր հայրենակիցները` ոչնչացումից... Հայ ոստիկանը նա է, ով ամեն Աստծո օր իր կյանքն է վտանգում, վտանգում է հանուն հասարակության, նույն հասարակության, որի որոշ շերտեր, մեղմ ասած, չեն էլ փորձում հասկանալ ոստիկանության դերը մեր կյանքում: Այսօր մեր հասարակության ամենախոցելի օղակներից է ոստիկանությունը: Անկայուն ու անկանխատեսելի աշխատանքային գրաֆիկ ունեցող, մշտապես վտանգի մեջ գտնվող ոստիկանը չնչին վարձատրություն է ստանում: Դա անթույլատրելի է: Անթույլատրելի է, որ ոստիկանի ընտանիքը չի օգտվում և ոչ մի արտոնությունից. նրա երեխան չի ստանում անվճար բարձրագույն կրթություն, ընտանիքի անդամը չի ստանում անվճար բուժօգնություն: Միջազգային ոստիկանական ասոցիացիան 64 անդամ պետություն ունի: Հավատացեք` անգամ աֆրիկյան ամենահետամնաց պետության ոստիկանն ավելի պաշտպանված ու սոցիալապես ապահովված է, քան մենք... Ցավում եմ, որ այսօր չկա արդարացի մոտեցում նաև ոստիկանների դրույքաչափերի վերաբերյալ: Համակարգի որոշ ծառայությունների` թոշակի անցած, 20 տարվա աշխատանքային ստաժ ունեցող կապիտանը ստանում է 200.000 դրամ կենսաթոշակ` այն պարագայում, երբ քրեական հետախուզության` 35 տարվա աշխատանքային ստաժ ունեցող գնդապետ թոշակառուն լավագույն դեպքում ստանում է 100.000 դրամ կենսաթոշակ: Դա այն դեպքում, որ հենց նրանք են նախականխում, կանխում, բացահայտում հանցագործությունները, վնասազերծում հանցագործներին` վտանգելով իրենց կյանքը: Կոչ ենք անում ԱԺ-ին և Կառավարությանը խտրականություն չդնել ոստիկանական համակարգի ծառայությունների միջև և հավասարեցնել ոստիկանության ծառայողների դրույքաչափերը: Եվս մեկ օրինակ: Կոռուպցիոն ռիսկերը չեզոքացնելու նպատակով դատաիրավական համակարգի, ԱԺ-ի և այլ կառույցների աշխատակիցների աշխատավարձերը սկսվում են 400.000 դրամից: Կոչ ենք անում հավասարեցնել ոստիկանական ծառայությունների և դատաիրավական համակարգի աշխատավարձերի չափերը: Այսօր օրենքով ապահովված չէ ոստիկանի սոցիալական, առողջապահական, իրավական պաշտպանվածությունը, ինչը կարող է հանգեցնել հիասթափության և կադրային ու մասնագիտական լուրջ կորուստների ոստիկանական համակարգում: Շնորհակալություն ոստիկանության պետ Ալիկ Սարգսյանին, ով իր պաշտոնավարման շրջանում կարողացավ բարոյական նոր լիցք հաղորդել ոստիկանության ողջ համակարգին և հատկապես ՄՀՆՋ-ի վետերաններին: Տարիներ շարունակ նրանք զուրկ էին օրենքով իրենց հասանելիք կոչումներից ու պարգևներից: Ոստիկանության պետն ըստ արժանվույն գնահատեց ոստիկանների մարտական ու ծառայողական ուղին և խրախուսում է թե կոչումներով, թե պարգևներով: Ոստիկանը միշտ կանգնած է եղել պետության և պետականության հիմքերում: Ոստիկանը օրենքի և օրինականության տառի ու ոգու պահապանն է: Այո, ոստիկանությունում էլ կան անցանկալի երևույթներ, որոնք անհրաժեշտ է արմատախիլ անել: Իսկ ինչ վերաբերում է հասարակություն-ոստիկան անջրպետին, ապա չկա, գոյություն չունի այդ հակամարտությունը, քանի որ ոստիկանությունը հասարակության մասն է, օրենքի պահապանը, քաղաքացիների իրավունքների և ազատությունների պաշտպանը: Գրիշա Սարգսյան Միջազգային ոստիկանական ասոցիացիայի հայաստանյան ներկայացուցչության նախագահ, Ոստիկանության գնդապետ