Այսօր «Արժանապատիվ տրանսպորտ» քաղաքացիական նախաձեռնությունը, չնայած «տրանսպորտային անհարմարություններին», մոնիթորինգի երնթարկեց Երեւանին կից մարզերից եկող միջքաղաքային տրանսպորտի վիճակը: Մասնավորապես՝ ակտիվիստներից մեկը առավոտյան ժամը 10:00-ին Արմավիրի մարզում էր:

Միջքաղաքային տրանսպորտը շարունակում է չսպասարկել էջմիածնեցիներին. կանգառում շուրջ 20 ուղեւոր սպասում էին որեւէ փոխադրամիջոցի.

«Այսօր էլ տրանսպորտ չկա՞»,- հարցրեցի ես մի խումբ երիտասարդների:

«Վերջին օրերին տաքսի էլ չկա. աչքիս էս անգամ մնաց ոտքով»,- կատակեց նրանցից մեկը:

Տասը րոպե անց կանգառին մոտեցավ մի մեքենա, որը չէր կրում տաքսի ծառայության համապատասխան նշան եւ առաջարկեց «հարմար գներով» հասցնել Երեւան:

Սակայն այստեղ էլ կանգառում կանգնած մի երիտասարդ մոտեցավ վարորդին եւ ասաց,որ չի կարող մարդկանց տեղափոխել, քանի որ «իրենց տաքսիներից» չէ:

Փորձեցի պարզել տղայի ինքնությունը, սակայն նա՝ տեսնելով, որ արդեն միացրել եմ ձայնագրիչը, խուսափեց ներկայանալ եւ «թույլ տվեց» Երեւան գալ:

Իսակովի պողոտայի սկզբնամասում ճանապարհային ոստիկանության երկու ավտոմեքենա էին կանգնած, որոնք արգելում էին դեպի Կենտրոն ընթանալ այս ճանապարհով:

Էջմիածնից մայրաքաղաք հասնելու համար մեզնից պահաջվեց 500 դրամ (երթուղայինի մեկ տոմսի կրկնակի գին) եւ 55 րոպե:

Ավելի ուշ կներկայացնենք նաեւ Կոտայքի մարզի Աբովյան քաղաքից դեպի մայրաքաղաք սպասարկող տրանսպորտի վիճակը:

«Արժանապատիվ տրանսպորտ» քաղաքցիական նախաձեռնություն