Անփութություն, որ կյանք արժեցավ
Մայիսի վերջին Արմավիր քաղաքի Երեւանյան խճուղու վրա տեղակայված գազալցակայանում տեղի ունեցած պայթյունի հետեւանքով զոհվեց Արեւիկ գյուղի բնակիչ, 35-ամյա Եղիշե Հարությունյանը:
ՎԱԶ 2106 մակնիշի ավտոմեքենան պայթել է հենց լիցքավորման ընթացքում: Ավտոմեքենայի գազի բալոնը չուգունից է, որի օգտագործումը եւ լիցքավորումը արգելված է: Լցակայանի աշխատակիցը մեքենան լիցքավորելու ընթացքում զրուցում էր վարորդի հետ:
Գազասարքավորումների եւ գազի շահագործման մասնագետ Կառլեն Խաչատրյանն ասաց, որ գազալիցքավորման համար թույլատրելի են միայն երկաթե եւ մեզանում դեռեւս սակավ գործածելի պլաստմասսայե բալոնները: «Պայթյունի դեպքում դրանք չուգունի պես բեկորների չեն վերածվում, հետեւապես մեծ չափի վնաս չեն հասցնում: Մինչդեռ չուգունի բալոնի պայթյունը նռնակի պայթյունի պես է. եթե մոտակայքում մարդիկ լինեն, զոհերն անխուսափելի են: Ճիշտ այնպես, ինչպես եղավ Արմավիրի դեպքում»,- ասաց Կ. Խաչատրյանը:
Գազալիցքավորման սարքի ցուցիչը, որի առավելագույն նիշը 260 ճնշում է` նշագծված կարմիրով, ՎԱԶ 2106-ի լիցքավորման ժամանակ կամ չի աշխատել, կամ աշխատել է, բայց սխալ ցուցմունքով: Սովորաբար այդպես արվում է դիտավորյալ` մի քանի դրամ ավել շահույթ ստանալու նպատակով:
«Եթե այդպես չանենք, լցակայանում աշխատելն անօգուտ կլինի: Ինչպես վաճառողն է գնորդին խաբում կշեռքի մեջ, այնպես էլ մենք` ճնշման մեջ»,- ասաց լցակայանի աշխատակիցներից մեկը` չցանկանալով հրապարակել իր անունը:
Երեւանյան խճուղու լցակայանի դեպքում լցասարքի ցուցիչը գերազանցել է առավելագույն ցուցանիշը, ինչին էլ հետեւել են պայթյունն ու մահը: Փաստի առթիվ Արմավիրի ոստիկանության քննչական բաժնում հարուցվել է քրեական գործ ՀՀ Քր.օր.-ի 157 հոդվածի հատկանիշներով:
ԱԺ պատգամավոր Նահապետ Գեւորգյանին պատկանող գազալցակայանը տեղակայված է նրա սեփականությունը հանդիսացող ապակե տարաների գործարանին կից:
Ոստիկանության մեր աղբյուրի տեղեկացմամբ` նախաքննությանը պատգամավոր Ն. Գեւորգյանի միջամտությունից հետո գազի շահագործման անվտանգության կանոնների խախտման վարկածը դուրս է եկել շրջանառությունից, ու մնացել է միայն անփութությունը, ինչի համար էլ պատասխան է տալու լցակայանի աշխատակիցը:
Մեկնաբանել