Չնայած ըստ մեղադրանքի՝ Աշոտ Հարությունյանի գործի դատաքննության սկզբում մեղադրող դատախազը նշեց, թե գործով տուժողների ցուցմունքներում հակասություններ չկան, բայց ինչպես պարզվեց, նրանք հակասական ցուցմունքներ են տալիս դեռ նախաքննությունից, և պաշտպան Տ. Հայրապետյանը իրավացիորեն էր պնդում, որ դատարանում նրանք առանձին-առանձին հարցաքննվեն:

Ըստ Աշոտ Հարությունյանի՝դատարանի բակ մտնելուց հետո դարպասներն իրենց հետևից փակվել են:

Իր գործընկերուհու՝Նունե Պառավյանի՝ իրեն տուն տանելու պահանջով ցանկացել է դուրս գալ դատարանի տարածքից, բայց դատավորը թույլ չի տվել: Ի վերջո կարգադրել է բացել դարպասները: Երբ երկրորդ անգամ Նունե Պառավյանի հետ վերադարձել է դատարանի տարածք, 4 կարգադրիչ կանգնած է եղել դատարանի բակում: Կանգնեցրել են Աշոտ Հարությունյանին: Վերջինս, ավտոմեքենան թողնելով դարպասներից դուրս, ներս է մտել դատարանի բակ: Դատավորն ու կարգադրիչները պահանջել են դատարանի շենք մտնել և զրուցել դատավորի հետ, ինչին ինքը չի համաձայնել, որից հետո իրեն ծեծել են: Ինքը ոչ ոքի չի հարվածել:

Գործով տուժողներ Էդգար Չատինյանն ու Էդգար Խանվելյանը դատարանում հետևյալ ցուցմունքները տվեցին. Էդգար Չատինյանն ասաց, որ դատավորի հետևից դատարանի բակ մտնելով ու մեքենայից իջնելով՝Աշոտ Հարությունյանը հետևյալ արտահայտությունն է արել. «Էս ուր եմ եկել ես»: Էդգար Խանվելյանի ցուցմունքով՝ նա ասել է. «Էս ուր ես ինձ բերել» (սա նաև նրա նախաքննական ցուցմունքն է): Տուժողները ցուցմունք տվեցին, որ մինչև դատավորի գալը դատարանի դարպասները փակ են եղել: Էդգար Խանվելյանի ասելով՝դատավորը զանգել նախազգուշացրել է իր գալու մասին, կոնկրետ Էդգար Չատինյանի հետ է խոսել: Չնայած վերջինս նախաքննության ընթացքում նմանատիպ ցուցմունք էր տվել, դատարանում, սակայն, հերքեց այդ հանգամանքը: Ասաց, որ պատուհանից են տեսել դատավորի գալը և դարպասները բացելով՝դուրս են եկել նրան դիմավորելու:

Ցուցմունք տվեցին, որ դատավորի և Աշոտ Հարությունյանի ներս մտնելուց հետո դարպասները փակվել են: Եվ դարպասները փակ վիճակում էլ Աշոտ Հարությունյանին ասել են՝գնա, հեռացիր: Էդգար Խանվելյանը հաստատեց, որ եթե Աշոտ Հարությունյանը ուզենար հեռանալ, չէր կարող: Նունե Պառավյանի խոսելուց հետո է դատավորը կարգադրել բացել դարպասները:

Կարգադրիչները հայտնեցին, որ դեպքի օրը իրենք երկուսով են հերթապահություն իրականացրել: Երբ Աշոտ Հարությունյանը երկրորդ անգամ դատարան է եկել, նրանց միացել է ևս երկու կարգադրիչ՝Ալբերտ Քոչարյանն ու Արթուր Բաղդասարյանը:

Էդգար Չատինյանի ցուցմունքով՝ ինքն է զանգել կանչել նրանց: Երկրորդ անգամ Աշոտ Հարությունյանը դատարան է վերադարձել այն պահին, երբ ինքն ու Էդգար Խանվելյանը մուտքի մոտ դիմավորելիս են եղել նրանց:

Սակայն Էդգար Խանվելյանը ցուցմունք տվեց, որ Աշոտ Հարությունյանը կարգադրիչների գալուց հետո է վերադարձել դատարան:

Հարցին, թե ինչու Աշոտ Հարությունյանի հեռանալուց հետո կարգադրիչները չեն զանգել ոստիկանություն՝ հնարավոր միջադեպը կանխելու համար, Էդգար Չատինյանը հակասական պատասխան տվեց. «Մտածեցինք՝ կարող ա չգա, կարող ա՝ էդ աղջիկը չթողա», ապա՝ «Զանգեցի Ալիկին, Արթուրին կանչեցի, ասի՝կարող ա՝Աշոտը գա, զինված գա»:

Կարգադրիչ Էդգար Խանվելյանը հակասեց իրեն՝պատասխանելով այն հարցին, թե արդյոք Աշոտ Հարությունյանը գիտե՞ր, որ դատավորի հետ է վիճաբանում. «Ես ինչ գիտեմ. կարող ա ըտեղ իմացավ, կամ հետո ա իմացել… Ասինք՝ գիտես ում հետ ես խոսում, սա դատավորն ա»: Մեղադրող դատախազը նշեց. «Համ ասում ես՝ասեցինք էս մարդը դատավորն ա, համ ասում ես՝եսիմ գիտեր, որ դատավորն ա, թե չէ»: «Կոնկրետ ես ասեցի՝ կգնա, իմանալով, որ դատավոր ա, կարող ա զենք բերի, ահաբեկի»,- իր պատասխանում կողմնորոշվեց կարգադրիչ Խանվելյանը:

Վերջինս նաև ցուցմունք տվեց, որ Աշոտ Հարությունյանն իրեն չի հարվածել, բայց հարվածել է Էդգար Չատինյանին: Ապա փորձեց շտկել իր պատասխանը. « Հարվածել ա, քաշել ա, չգիտեմ: Որ կուրտկեն հանել ա, միգուցե կուրտկից ա ճակատը ճղվել»: Դատախազը այս հակասությունն էլ նկատեց:

Էդգար Չատինյանի ասելով՝իր վնասվածքները Աշոտ Հարությունյանի հետ քաշքշուկի ընթացքում է ստացել, կոնկրետ որ պահին, ինչի հետևանքով, չի հիշում. Աշոտ Հարությունյանը բռնել էր բաճկոնից, բաց չէր թողնում, քաշել, պատռել է: Ցուցմունք տվեց, որ Աշոտ Հարություննյանն իրեն չի հարվածել:

Էդգար Չատինյանը դատարանում հայտնեց, որ դեպքից հետո՝գիշերը, հավանաբար դատավորի զանգով ոստիկաններ են եկել իրենց հետևից ու տարել հարցաքննության: Վերցրել են նաև իր բաճկոնը: Այդ գիշեր իրենք ոչ մի գրություն չեն գրել: Ինքը ոստիկաններին հայտնել է, որ միջադեպը ոչ թե իրենց, այլ դատավորի հետ էր կապված:

Էդգար Խանվելյանն էլ դատարանում ասաց, որ Աշոտ Հարությունյանը անհարգալից էր սկզբում դատավորի, հետո նաև իրենց նկատմամբ: