«Չնայած այն բանին, որ ճարտարապետ Ռաֆայել Իսրայելյանի տունը չի ընդգրկվել պատմամշակութային հուշարձանների պետական ցուցակում, մշակույթի նախարարությունը համարում է, որ քաղաքաշինական ծրագրերում պետք է հաշվի առնել նշանավոր ճարտարապետի տան պատմական արժեքը: Ըստ Երևանի քաղաքապետարանի տեղեկության՝ Սարյան 9 հասցեում կառուցվում է հյուրանոցային համալիր, որում նախատեսվում է մասնակի վերականգնել Ռ.Իսրայելյանի տան գլխավոր ճակատի պատը»,- «Առավոտի» հարցմանն այսպես պատասխանեց ՀՀ մշակույթի նախարարության աշխատակազմի պատմության և մշակույթի հուշարձանների պահպանության գործակալության Երևանի տարածքային բաժնի պետ Կ.Այվազյանը:

Ժամեր չանցած՝ գետնին հավասարվեց վարպետի տունը: «Խնդիրը ոչ թե սեփականատերերը, այլ ՀՀ մշակույթի նախարարության և Երևանի քաղաքապետարանի քաղաքաշինության վարչությունը և ճարտարապետներն են: Մշակույթի նախարարությունն ավելի լավ է՝ ոչինչ չանի»,- «Առավոտի» հետ զրույցում գերատեսչությունների անտարբերության վերաբերյալ իր վրդովմունքը հայտնեց ակցիայի կազմակերպիչ, մասնագիտությամբ մշակութաբան Անուշիկ Ավետյանը: