![](/static/articles/52/80/l-5vYS8de8yP.jpg)
«Նախարարի հանձնարարականը գրոշի արժեք չունի՞»
«ԷկոԼուր» հասարակական կազմակերպությունը և «Չենք լռելու» երիտասարդական նախաձեռնությունը շարունակում են համատեղ ահազանգերի շարք հնչեցնել՝ «Բնություն, թե՞ փող» ընդհանուր խորագրով:
Ըստ հավաստի աղբյուրների՝ չնայած բնապահպանության նախարարության բազմաթիվ հավաստիացումների, որ նման բան չի լինի՝ Թռչկանի ջրվեժի մոտ երեկ ծանր տեխնիկա է բերվել: Թեև շինարարական աշխատանքները դեռ չեն սկսվել, սակայն տեխնիկայի տեղակայումը դրա նախանշանն է:
Փաստացի չի կատարվում բնապահպանության նախարար Արամ Հարությունյանի հանձնարարականը՝ շինարարական աշխատանքները դադարեցնելու վերաբերյալ:
«ԷկոԼուրը» և «Չենք լռելուն» պահանջում են բնապահպանության նախարարությունից սկզբունքայնություն և հետևողականություն դրսևորել սեփական գործողություններում և ետ կանչել նախարարի ստորագրած՝ Թռչկանի վրա ՀԷԿ-ի կառուցման դրական եզրակացությունը և թույլտվությունը:
Այդ փաստաթղթերը, անօրինական լինելուց զատ, հակասության մեջ են մտնում նախարարի ստորագրած մեկ այլ փաստաթղթի՝ շինարարական աշխատանքները դադարեցնելու վերաբերյալ հանձնարարականի հետ:
Հակառակ դեպքում մենք հարկադրված կլինենք ընկալել նախարարի բոլոր փարատող հայտարարությունները այս խնդրի վերաբերյալ որպես շեղող միջոց, երբ դանդաղ, բայց հաստատուն քայլերով ոչնչանում է հատուկ պահպանության գոտին՝ Թռչկանի ջրվեժը:
«ԷկոԼուր» հասարակական կազմակերպություն
«Չենք լռելու» երիտասարդական նախաձեռնություն
Մեկնաբանություններ (1)
Մեկնաբանել