Երեկ ֆեյսբուք սոցիալական ցանցում  «ՀԻՄԱ՛» երիտասարդական նախաձեռնության կողմից կազմակերպվել է միջոցառում, որի պահանջը ներկայացված է ստորև.

«Երևանի կենտրոնում գտնվող, բազմաթիվ երկրաշարժերին և սովետական մսաղացին դիմակայած Ս. Աստվածածին (Կաթողիկե) եկեղեցին (13-րդ դ.) այսօր վտանգված է: Այս անգամ խոսքը ոչ թե քանդելու մասին է, այլ` պատմական միջավայրի աղճատման:

Նոր նախագծով նախատեսվում է փոքրածավալ կաթողիկեին կից կառուցել ծավալով տասնապատիկ անգամ ավելի մեծ Ս. Աննա եկեղեցին, իսկ մի քանի մետր հեռավորության վրա` եռահարկ կաթողիկոսական երևանյան նստավայրը: Շինարարական աշխատանքներն արդեն սկսվել են: Թե նոր եկեղեցու, թե նոր նստավայրի դեպքում կիրառվել է բավականին ակտիվ ճարտարապետություն, որը ամբողջովին ճնշում է փոքրածավալ ու զուսպ ճարտարապետությամբ Կաթողիկե եկեղեցուն:

Կառուցվող շինություններն իրենց ծավալով ազդում են ոչ միայն Կաթողիկեի, այլ` ամբողջ խաչմերուկի ու շրջակա ճարտարապետության վրա:

Պահանջում ենք անհապաղ դադարեցնել շինարարությունը և մշակել տարածքի բարեկարգման ավելի ընդունելի նախագիծ:

Միջոցառմանն այս պահի դրությամբ միացել են ավելի քան 240 մարդ և միացողների թիվը շարունակում է շեշտակիորեն աճել՝  ապացուցելով խնդրի կարևորությունը:

«ՀԻՄԱ» Երիտասարդական նախաձեռնություն:

Հայաստանի ապագան կախված է մեկ մարդուց և այդ մեկ մարդը դու ես