Լուսինե Փարսադանյան

Ալավերդի քաղաքի Բաղրամյան թաղամասի Մարտիրոս Թանդիլյանի անվան համար 10 դպրոցում աշակերտները խուսափում են օգտվել դպրոցի սանհանգույցներից` տիրող հակասանիտարական վիճակի պատճառով: Դպրոցի 7-րդ դասարանի աշակերտ Էրիկ Շահնազարյանը սանհանգույցներց օգտվում է, բայց  նկատել է, որ այն  շատ աշակերտների  տհաճություն է պատճառում: Նույն դպրոցի աշակերտ Հասմիկին էլ հուզում է զուգարաններում լվացարանների  բացակայությունը: Այստեղ չկա նաեւ լուսավորություն: «Բավարար գումար չենք ունեցել վերանորոգման համար»,- ասում է դպրոցի տնօրեն Սեդա Նալբանդյանը:

Ալավերդիում կա 8 հիմնական դպրոց: Մեր ուսումնասիրած 3 դպրոցների սանհանգույցներում բացակայում էին տարրական պայմանները: Միայն Եղիշե Չարենցի անվան թիվ 9 եւ Հովհաննես Թումանյանի անվան թիվ 2 հիմնական դպրոցներում է, որ սանհանգույցների մի մասը մասնակի վերանորոգված է: Հովհ. Թումանյանի անվան թիվ 2 դպրոցի տնօրեն Լուսինե Միքայելյանն ասում է, որ ճիշտ է, վերանորոգման անհրաժեշտություն զգացվում է, սակայն եղածն էլ պետք է պահպանել: Քաղաքի թիվ 9 դպրոցում էլ զուգարաններում ջուր չկա, իսկ դռները փականներ չունեն:

Քաղաքի դպրոցների զուգարանների սանհանգույցները ե՞րբ են կարգի բերվելու մեր հարցին Լոռու մարզպետ Արթուր Նալբանդյանը հայտնեց, որ մարզի 151 դպրոցների շուրջ 60 %-ի սանհանգույցները վերանորոգման ենթակա են: «Բոլոր դպրոցների տնօրեններն արդեն հանձնարարություն են ստացել դպրոցներին հատկացվող պահպանման գումարներն ուղղել հատկապես սանհանգույցների ու խոհանոցների սանիտարական վիճակի բարելավմանը»,- տեղեկացրեց մարզպետը: