Լուսինե Փարսադանյան

Ալավերդու Թումանյան փողոցի տարբեր հատվածներում կառուցված նախկին 5 կանգառները խիստ հակասանիտարական վիճակում են գտնվում: Կանգառում սպասողները նստարանների կոտրված փայտե ճաղավանդակների բացվածքներն օգտագործում են որպես աղբամաններ: Համայնքային բյուջեից 2013թ.-ին 1,6 մլն դրամով քաղաքի տարբեր հատվածներում կառուցվել են նոր կանգառներ: Հին կանգառների վերահսկումը քաղաքապետարանի «Կոմունալ բարեկարգում» ՍՊԸ-ի ուշադրությունից դուրս է մնացել:  Մինչդեռ, դրանք արդեն երկար ժամանակ է վերանորոգման կարիք ունեն:

Ստեղծված հակասանիտարական վիճակի պատճառով քաղաքացիները կամ` չեն նստում կանգառների նստարաններին, կամ` նստում են ուղղակի աղբամանների հարեւանությամբ: Այս դեպքում առանձնապես նեղվում են տարեցները: Խնդիրն առկա է արդեն մի քանի տարի, սակայն քաղաքապետարանն այդպես էլ չի անդրադառնում դրան: Մեր հարցումից պարզվեց, որ քաղաքի Թումանյան փողոցի կանգառներում տիրող հակասանիտարական վիճակին քաջատեղյակ է նաեւ քաղաքապետ Արտավազդ Վարոսյանը:

«Կանգառների նստարանների կոտրած փայտերը պարբերաբար տեղադրվում են»,- հայտնեց քաղաքապետը: Այնուամենայնիվ, ալավերդցիները  կանգառների նստարանների բացվածքները երբեք փակված չեն տեսնում, ավելին, դրանց վիճակն օրեցօր վատթարանում է:  Արտավազդ  Վարոսյանը հավաստիացնում է, որ առաջիկայոմ պետք է կատարվի կանգառների գույքագրում, իսկ մոտակա օրերին հայտարարված համաքաղաքային շաբաթօրյակին զուգահեռ կանգառների խնդիրը լուծում կստանա: 

Նշենք, որ նշված կանգառներից մի քանիսի տանիքների կաթոցքների պատճառով անձրեւային եղանակներին մարդիկ պաշտպանված չեն լինում: «Այստեղ արդեն մեծածավալ աշխատանքներ պետք է կատարվեն»,- հավաստիացնում է քաղաքապետը: Ալավերդու հին կանգառների   վերանորոգմանը  ալավերդցիներն սպասում են արդեն մի քանի տարի: