Էմմա Պետրոսյան

Արեւածագցիները վերջին օրերի եղանակային պայմաններից գրեթե չեն տուժել, գյուղը գտնվում է նախալեռնային բարձրադիր գոտում, այստեղ պտղատու ծառերը Արարատյան դաշտի համեմատ` մեկ ամիս, իսկ Ալավերդու համեմատ` 20 օր ուշ են ծաղկում: «Էդ Արարատյան դաշտավայրում ա ծիրանը վերջացել, քաղել են արդեն»,- կեսկատակ-կեսլուրջ ասում է Լոռու մարզի Արեւածագ գյուղի բնակիչ Գեւորգ Գեւորգյանը:

Գեւորգի այգին, օրինակ, անվնաս է մնացել: Թեեւ սպասվող ցրտահարության մասին տեղյակ է եղել, բայց իր այգու պտղատու ծառերը ցրտահարությունից պաշտպանելու միջոցներ նախապես չի ձեռնարկել: «Ծիրան ա, խնձոր ա, տանձ ա, ընկույզ ա. դե մեզ առայժմ ոչ մի վնաս չի հասցրել, ծիրանը ուշ ա ծաղկում, ցուրտը չի տանում: Կարտոշկին էլ վնաս չի տվել»,- ասում է նա:

Արեւածագում ցրտահարությունից հիմնականում վնասվել են ընկուզենիներն ու ծիրանենիները: Արեւածագի բնակիչ Արկադի Հովհաննիսյանի այգում ընկուզենիներն այս տարի պտուղ չեն տա: «Ծառերն անկախ ամեն ինչից արդեն կենդանացել են, գարուն ա: Ես նայել եմ բողբոջները` կակալը ջուր էր ընկել, ցուրտը տարած կլինի ինձ թվում ա: Բայց դե, դա ժամանակի ընթացքում կպարզվի»,- բացատրում է Արկադին: Նույն գյուղի բնակիչ Աշոտ Ոսկանյանի մտավախությունն էլ կարտոֆիլի բերքի համար է, ասում է` գյուղի 60-70 %-ն արդեն ցանել է կարտոֆիլը: