HY RU EN

Անի Հովհաննիսյան

«Քո ուղեղը վնասվածք ունի»,- Սարգիս Հակոբյանի քույրը՝ Հասմիկ Խաչատրյանին

Գավառի ընդհանուր իրավասության դատարանում մարտի 2-ին տեղի ունեցավ Սարգիս Հակոբյանի հերթական դատական նիստը՝ կնոջը ծեծի եւ խոշտանգումների ենթարկելու վերաբերյալ: Վերջինիս մեղադրանք է առաջադրվել ՀՀ քրեական օրենսգրքի 119-րդ հոդվածով՝ խոշտանգում:

Նախորդ դատալսմանը վկայություն է տվել Սարգիս Հակոբյանի հայրը՝ Համլետ Հակոբյանը, իսկ մայրը՝ Վարսիկ Հակոբյանը (բախտագուշակ Վարսիկ) հրաժարվել է գալ դատարան: Նա նշել է, որ օգտվում է հարազատի դեմ ցուցմունք չտալու սահմանադրական իր իրավունքից: 

Վկայության էին ներկայացել նաեւ Սարգիս Հակոբյանի քույրերը՝ Վիկտորիա եւ Վարդուհի Հակոբյանները, ինչպես նաեւ նրանց ընտանիքի ծանոթներն ու հարազատները: Դատարան որպես վկա էին հրավիրվել նաեւ Գավառի դատաբժիշկ Զանյանը, դատաբժիշկ-փորձագետներ Չախոյանը եւ Մարկոսյանը, ովքեր չէին ներկայացել: Դատավոր Աղվան Պետրոսյանը հայտարարեց, որ դատարանը միջոցներ կձեռնարկի մյուս դատալսմանը դատաբժիշկների ներկայությունն ապահովելու համար:

Վկայությամբ հանդես եկավ Սարգիս Հակոբյանի կրտսեր քույրը՝ Վարդուհի Հակոբյանը: Վերջինիս վկայությունը եւ դատալսման այլ մանրամասները՝ տեսանյութում: 

Հաջորդ դատական նիստը տեղի կունենա ապրիլի 18-ին:

Հ.Գ. Դատական նիստի ընթացքում Սարգիս Հակոբյանի կողմնակիցներից մեկը մոտեցել է «Կանանց աջակցման կենտրոն» ՀԿ-ին սպասարկող ավտոբուսի վարորդին, ասել. «Աղջիկներն ասում են՝ պլակատները տուր», վերցրել է կազմակերպության կանանց իրավունքների մասին գրություններով պաստառներն ու անհետացել։ Հիշեցնենք, որ կանանց իրավուքներով զբաղվող կազմակերպությունների ներկայացուցիչները մինչեւ դատական նիստը սկսելը պաստառներով բռնության դեմ ակցիա էին իրականացնում։