Երեկ տեղական ժամանակով 15:00-ին Գերմանիայի մի քանի քաղաքներում հարյուրավոր երիտասարդներ, համայնքների անդամներ ու հայազգի բնակիչներ ոտքի են կանգնել` դատապարտելու Քեսաբի դեմ կատարվող ոտնաձգությունները: 

Ակցիան Քյոլն և Համբուրգ քաղաքներում Գերմանահայոց կենտրոնական խորհրդի աջակցությամբ նախաձեռնել են ԳԿԽ անդամ երիտասարդները: Իսկ Դյուսելդորֆում այն կազմակերպել է Գերմանիայի հայ ակադեմիականների միությունը: Նրանց մեծապես աջակցել է Եվրոպայի հայկական համագումարի Գերմանիայի մասնաճյուղը և «Հայկական վերածնունդ» շարժման Գերմանիայի մասնաճյուղը: Մասնակիցները «SAVE KESSAB» պաստառներով հավաքվել են քաղաքների կենտրոնական հրապարակներում կամ թուրքական դեսպանատան ու հյուպատոսարանների առջև, պահանջել են կասեցնել վայրագությունները:

 «Մենք շատ լուրջ ենք պատրաստվել, արդեն գերմանական մի քանի թերթեր անդրադարձել են այս ակցիային, օրինակ` «Spiegel Onine»-ը, որ շատ կարևոր է, պարզաբանում է ԳԿԽ անդամ Սամվել Լուլուկյանը,- մենք պահանջում ենք, որ գերմանական իշխանությունները ճնշում գործադրեն Թուրքիայի վրա որպես ՆԱՏՕ-ի պարտնյոր, որովհետև մամուլում էլ փաստեր կան, որ Քեսաբի դեպքերը Թուրքիայի կողմից են կազմակերպված, Դավութօղլուի և իրենց գաղտնի ծառայության շտաբի պետի հեռախոսազրույցը գաղտնազերծվել է, թե ինչպես են իրենք պլանավորում ներխուժել Սիրիա: Սա անընդունելի է Եվրոպայի համար»:

Գերմանահայերը դրական փոփոխությունների սպասելիքներ ունեն, որովհետև որոշ քաղաքական ուժեր, մասնավորապես CDU-ն և CSU-ն նախօրեին հայտարարել են, որ անընդունելի են համարում Թուրքիայի գործողությունները` ասելով, որ նա փորձում է պատերազմական գործողությունների մեջ ներքաշել նաև ՆԱՏՕ-ին: Իսկ մեր հայրենակիցները նույն ցեղասպանությունն են վերապրում Քեսաբում արդեն երրորդ անգամ:

ԳԿԽ տարածած հաղորդագրության մեջ խորհրդի նախագահ դոկտոր Նազարեթ Աղեգույանը նշում է, որ 21-րդ դարում ազգային փոքրամասնությունների պաշտպանությունը բոլոր միջազգային կազմակերպությունների ու զարգացած պետությունների գլխավոր առաքելությունն է: «Գերմանահայոց Կենտրոնական Խորհուրդը, գերմանահայոց անունից դատապարտելով Թուրքիո այս արարքը, կոչ է անում բոլոր այն կառավարութիւններին, որոնք Սուրիո հակամարտության մեջ ազդեցիկ դերակատարություն ունեն, ի գործ դնելու իրենց բոլոր միջոցները՝ վերջ դնելու Քեսապի դեմ այս ոտնաձգություններին և թույլ տալու Քեսապի բնակիչներին իրենց բնակարանները վերադառնալու՝ երաշխավորելով նրանց ապահովությունն ու անվտանգությունը»: 

Երեկվա միջոցառմանը հայերին են միացնել նաև բազմաթիվ ասորիներ, ռուսներ, հույներ: Կոչերով ելույթ են ունեցել ԳԿԽ անդամ Մինու Նիկպայը, Քյոլնի հոգևոր առաջնորդ Հայր Հրաչը, Գերմանաիայի առաջնորդարանի թեմական խորհրդի ատենապետ Իիյաս Ույարը, ասորիների համայնքի ատենապետը, հայկական համայնքների ատենապետերը և այլ հրավիրյալներ: