![](/static/articles/53/93/l-BG5EQqmWgB.jpg)
Ըստ կոլեկտիվի՝ դպրոցի տնօրենը ալյուր չի վաճառել
Գեղարքունիքի մարզի Սեւանի Մեսրոպ Մաշտոցի անվան N1 հիմնական դպրոցի ծնողական խորհրդն ու մանկավարժական կոլեկտիվը նամակ են ուղարկել «Հետքին»:
Նրանք արձագանքել են հոկտեմբերի 10-ին հրապարակված հոդվածին, համաձայն որի` դպրոցի տնօրեն Մարիետա Միրզոյանը կասկածվում է 17 պարկ ալյուր վաճառելու մեջ:
«Ըստ լրատվամիջոցների`ՄԱԿ-ի կողմից իրականացվող ծրագրի շրջանակներում հիշյալ դպրոցում կատարվել է չարաշահում. վաճառվել է 17 պարկ ալյուր: Իրականությունն այլ է. անհիմն մեղադրել մի տնօրենի, որն իր մանկավարժական գործունեության ընթացքում աշխատանքին նվիրվել է հոգով ու սրտով, անմնացորդ»,-գրված է նամակում:
Վերջիններս որպես ասվածի ապացույց վկայակոչել են տնօրենի կոչումները. 2001թ. ՀՀ ԿԳՆ-ի կողմից ճանաչվել է լավագույն տնօրեն «Գեղագիտական դաստիարակության լավագույն փորձի համար», 2005թ. արժանացել է ՀՀ վարչապետի շնորհակալագրի, 2008թ. շնորհվել է ՀՀ վաստակավոր մանկավարժի պատվավոր կոչում, իսկ 2009-ին՝ պարգևատրվել է ՀՀ պաշտպանության նախարարության պատվոգրով:
«Իր պաշտոնավարման օրվանից մինչև օրս զբաղվել եւ զբաղվում է դպրոցաշինության գործով, եւ շատերը փորձի փոխանակման նպատակով հաճախ են լինում մեր դպրոցում:
Դպրոցի մանկավարժական կոլեկտիվը զարմացած եւ զայրացած է, որ կարող են գրչի մեկ հարվածով մրոտել տարիների վաստակ ունեցող մանկավարժական մի կոլեկտիվի, որի ձեռքբերումները ակնհայտ են թե' մարզում, թե' հանրապետությունում»,-գրված է նամակում:
Թեեւ դպրոցի կոլեկտիվը «գրչի մեկ հարվածով մրոտել» արտահայտությամբ մեղադրում է լրագրողներին, սակայն նշենք, որ դպրոցից 17 պարկ ալյուր վաճառելու մասին լուրը հաստատել էին Գեղարքունիքի մարզպետարանից, իսկ ոստիկանությունից էլ տեղեկացրել էին, որ այդ փաստով նյութեր են նախապատրաստվում:
Կոլեկտիվն իր նամակով այնուհետեւ պարզաբանել է, որ նշված ծրագիրը նախատեսված է դպրոցի 1-4 դասարանների 304 աշակերտների սննդի կազմակերպման համար, որի շրջանակներում դպրոցը ՄԱԿ-ի պարենի ծրագրով ստանում է տարբեր սննդամաթերք, այդ թվում` ալյուր:
Ծնողական կոմիտեի անդամ Մագդա Վարդանյանը նամակով հավաստել է, որ «Դպրոցական սնունդ» ծրագրից օգտվում են նաեւ բարձր դասարանների 30 անապահով աշակերտներ: Դպրոցը 6 ծնողների միջոցով կազմակերպում է ամենօրյա հացաթխման և սննդի պատրաստման աշխատանքները, որը վերահսկվում է ինչպես տնօրենի, այնպես էլ ծնողական խորհրդի կողմից:
«Համաձայն ծրագրի, նշված ճաշարանի 6 աշխատակիցները իրենց աշխատանքի դիմաց վարձատրվում են ոչ թե դրամով, այլ սննդամթերքով, եւ ամեն ամիս ծրագրից ստանում են յուրաքանչյուրը մեկ պարկ ալյուր, ինչպես նաեւ այլ սննդամթերք: Հաշվի առնելով աշխատակիցների խնդրանքը եւ նրանց սոցիալապես անապահով վիճակը` իրենց հասանելիք ալյուրը ժամանակից շուտ էր տրվել, որի վերաբերյալ կազմվել են համապատասխան փաստաթղթերը»,-ասված է նամակում:
Իսկ ծնողական խորհրդի նախագահ Անահիտ Վարդանյանն էլ փաստել է, որ անմիջական մասնակցություն ունի այդ աշխատանքներում եւ վստահեցնում է, որ սննդի բացթողումը կատարվում է լիազոր անձի կողմից, ալյուրի ստացումն ու բացթողումը հաշվառվում է խստագույնս` փաստաթղթերով, եւ փաստացի ոչ մի տարբերություն չի գրանցվել, իսկ սննդի որակից գոհ են երեխաները, ծնողները եւ դասվարները:
Նկատենք, որ դպրոցի կոլեկտիվի նամակն ավելի շատ ուղղված է մարզպետարանին, քան լրատվամիջոցներին, քանի որ այդ մասին հաստատել էր հենց մարզպետարանը:
Մեկնաբանել