Տեսանյութեր
Լուսանկարներ
Բեռլինում բողոքի ցույցերը մեկնարկեցին
Երեկ Գերմանիայի մայրաքաղաք Բեռլինում մեկնարկեց Հայոց ցեղասպանության 99-րդ տարելիցի կապակցությամբ նախատեսված բողոքի ցույցերի շարքը «Այլևս երբեք» նշանաբանով: Ցույցն սկսելով թուրքական դեսպանատան առջև` մասնակիցները խաղաղ երթով շարժվել են դեպի Հոլոքոստի հուշաքարեր, ծաղիկներ դրել և քայլել դեպի Բրանդենբուրգյան դարպասներ: Այստեղ նրանց դիմավորել են տեղի ոստիկանները` արգելելով պաստառների և դրոշների ցուցադրությունը:
«Ամեն տարի էլ այս օրերին Բրանդենբուրգյան դարպասների մոտ մենք կանգնում ենք, ճիշտ է, ոստիկանները մեզ չեն խոչնդոտում, բայց այս անգամ դրոշները և պաստառները ծալել տվեցին` պատճառաբանելով, որ հիմա այստեղ երեխաների միջազգային տոնակատարություն է անցկացվում, ինչ-որ թուրք-գերմանական միջոցառում էր»,- մասնակիցներից պատմում է Հայկ Սարգսյանը:
Խաղաղ երթը, անցնելով գնչուների հուշաքարի մոտով, կանգ է առել կանցլեր Անգելա Մերկելի նստավայրի մոտ: Այստեղ նրանք կանցլերից պահանջել են հայոց Մեծ եղեռնի ճանաչում և դատապարտում, այնուհետև բաց նամակը հանձնել, ինչպես ամեն տարի են վարվում:
Ցուցարարները, որոնց թվում նաև թուրք և քուրդ բեռլինաբնակներ են եղել, «Ցեղասպանության ճանաչման հանձնախմբի» ղեկավար Թեսա Հոֆմանի ղեկավարությամբ շարժվել են Բեռլինի Շարլոթենբուրգ թաղամաս` ծաղիկներ դնելու նաև Յոհաննես Լեփսիուսի տղայի գերեզմանին, որի հարակից տարածքում շուտով կկառուցվի հայոց ցեղասպանության զոհերի հիշատակին նվիրված կոթող:
Մեկնաբանություններ (1)
Մեկնաբանել