Մահացել է կոմպոզիտոր Կոնստանտին Օրբելյանը
Այսօր ԱՄՆ-ում՝ 86 տարեկանում մահացել է կոմպոզիտոր Կոնստանտին Օրբելյանը:
Կոնստանտին Օրբելյանը ծնվել է 1928թ. հուլիսի 29-ին, Արմավիրում: Սովորել է Բաքվի կոնսերվատորիային կից երաժշտական հատուկ դպրոցում: 1952թ. ընդունվել է Երևանի Ռոմանոս Մելիքյանի անվան երաժշտական ուսումնարան, որից հետո` Երևանի Կոմիտասի անվան պետական կոնսերվատորիա:
1956-ից եղել է Հայաստանի էստրադային նվագախմբի դիրիժորն ու գեղարվեստական ղեկավարը: 1957թ. դարձել է ԽՍՀՄ Կոմպոզիտորների միության անդամ: 36 տարի գլխավորել է Հայաստանի պետական էստրադային նվագախումբը: Նրա հայտնի երգերը բազմաթիվ կատարողների ներկայացմամբ արժանացել են մի շարք մրցանակների` «Երգել, նշանակում է ապրել», «100 երջանիկ ժամեր», «Շնորհակալություն կյանքին», «Սերը չի ծերանում», «Դու այն չես, ով պետք է ինձ», «Հիշեք» և այլն: 1974թ. արժանացել է ՀԽՍՀ, 1979թ.` ԽՍՀՄ ժողովրդական արտիստի կոչմանը: 1992թ. մեկնել է ԱՄՆ և բնակություն հաստատել Սան Ֆրանցիսկոյում: 2012թ. պարգևատրվել է ՀՀ Պատվո շքանշանով:
Լուսանկարը՝ wikipedia-ից
Մեկնաբանել