Մարիամ Մաթևոսյան

Արդեն երկու ամիս է Ակսել Բակունցի տուն-թանգարանը  իր այցելուներին է ներկայանում նոր ցուցադրությամբ:

Թանգարանը հիմնադրվել է 1968  թվականին Գորիսի այն տանը, որտեղ ծնվել է Ակսել Բակունցը:

Նորացված ցուցադրության մեջ տեղ են գտել գրողի անձնական լուսանկարչական ապարատը, որն առաջին անգամ է ցուցադրվում, ինչպես նաև նրա սցենարով նկարահանված Ֆիլմերից լուսանկարներ: Ամբողջությամբ փոխվել է շարժական ցուցադրական վահանակները: Ննջասենյակի պատից կախված Մարտիրոս  Սարյանի կտավը, որտեղ պատկերված է Բակունցն իր մոր հետ, տեղափոխվել է ցուցափեղկ՝ իր տեղը զիջելով գյումրեցի նկարչուհի Մարիամ Ասլամազյանի հեղինակած նկարին:

Թանգարանի տնօրեն Վարդան Սարգսյանի խոսքով՝ նորացված ցուցադրությունը միտված է ոչ միայն  նոր շունչ տալու թանգարանի գործունեությանը, այլև ակտիվացնելու մարդկանց այցելությունը արձակագրի տուն: 2013թվականի տվյալներով տուն-թանգարանն ունեցել է 3 հազարից ավելի այցելու:

«Շատերն են եղել այստեղ, մասնավորապես գորիսեցիներ, ուստի մեր այս քայլով ցանկացել ենք նոր հետաքրքություն  առաջացնել այցելուների մեջ»,- ասում է Վարդան Սարգսյանը:

Նորացված սրահի աշխատաքներն իրականացվել են ՀՀ Մշակույթի նախարարության աջակցությամբ, իսկ տուն-թանգարանի ջեռուցման համակարգի և ցանկապատի վերակառուցման ծրագիրն իրականացվել է Հայաստանի Սոցիալական ներդրումների հիմնադրամի կողմից. սկզբնական շրջանում 10%-ը պետք է ներդներ համայնքը, բայց չստանալով անհարժեշտ աջակցություն՝ համայնքի անունից ներդրումը կատարել է Պոլսահայերի մշակութային միությունը: