Ամեն տարի, Սուրբ Հարության տոնին հաջորդող կիրակի օրը Արմավիրի մարզի Աղավնատուն գյուղում նշում են Սուրբ Կարմրավորի օրը: Գյուղի «Բաղբաղներ» կոչվող այգիների շրջանում է գտնվում «Կարմրավոր» սրբավայրը: Այն կառուցված է հասարակ քարերից, իսկ շրջակայքում տարբեր ձեւի ու մեծության բազմաթիվ տապանաքարեր կան, որոնք հարյուրամյակների պատմություն ունեն:

Սուրբ Կարմրավորի տոնին Աղավնատուն ուխտագնացության են գալիս տարբեր վայրերից: Առավոտից մինչ ուշ երեկո մարդիկ գնում են սրբավայր, մոմ վառում, մատաղ անում եւ օրը դարձնում են իսկական տոն:

Սրբավայրի մոտակայքում «հանգրվանել» էին նաեւ լարախաղացները: «Յալանչին» 40 տարեկան կին էր՝ Անժիկը: Օրն արդեն կիսվել էր: Անժիկը մեզ հետ զրույցում պատմում է, որ շատ է «թռվռացել» հոգնել է, բայց գումարի կարիք ունի, պիտի մարդկանց ուրախացնի, որ հնարավորինս շատ վաստակի: Դեռ խոսքը չէր ավարտել, երբ նկատեց լավ հագուկապով մարդկանց. «Լավ ախպերս, պիտի գնամ, սրանք փող տվող են երեւում, ոնց որ հարուստ են: Կանգնելով երեխուս փորը չի կշտանում, պիտի աշխատեմ»,-ասաց Անժիկն ու պարելով մոտեցավ հարուստներին:

Լարաղացացը երեխա էր, նա էլ էր հոգնել, բայց չէր կանգնում. Գուցե նա էլ գումարի կարիք ուներ: