«Վա՜յ ձեզ կեղծավորներիդ, օրենսգետներիդ և փարիսեցիներիդ, որ Երկնքի Արքայությունը փակում եք մարդկանց առաջ. դուք չեք մտնում և մտնողներին էլ թույլ չեք տալիս, որ մտնեն» (Մատթ. 23:13)

Ասում են` մեր օրերում Գարեգին Բ կաթողիկոսի համար ազնիվ ու նվիրյալ հոգևորականներին «կարգալույծ» հռչակելը խղճի պարտք է, հավատարմության երդում, ինչը նա իրականացնում է` չխնայելով ջանք ու եռանդ: Նմանաբնույթ ապօրինի վճիռների այս «մոդայիկ տեղատարափը» ոչ մի կերպ չի դադարում` պատճառ դառնալով համաժողովրդական հուզումների, պոռթկումների, գայթակղությունների և ի վերջո, եկեղեցուց հեռացման: Այն տպավորությունն է, որ Էջմիածնի ներկա ղեկավարները ոչ թե Աստծուն են ծառայում, այլ` հակաքրիստոսին: Անցյալ տարեվերջին կամայական կերպով, խաբեությամբ ու վրեժխնդրության ոգով եկեղեցական ծառայությունից դուրս դրվեց Եղիա աբեղա Խաչատրյանը, իսկ այսօր էլ նույն բռնակալ ճակատագրին արժանացան Մխիթար աբեղա Գուտուզյանը և Մարտիրոս քահանա Բերբերյանը: Ովքե՞ր են հաջորդները... Զավեշտալին այն է, որ հակառակ մամուլում և հասարակության մեջ բարձրացած մեծ աղմուկին` այդպես էլ կարգալույծ չհռչակվեցին հանցագործ աշխարհի հետ սերտ կապեր վայելող Վաչե քահանա Հայրապետյանը, միասեռական հակումներով օժտված Հակոբ աբեղա Գրիգորյանը և ուրիշներ: Ընթերցողի դատին ենք ներկայացնում «Ֆեյսբուք» սոցիալական կայքի որոշ օգտատերերի ուշագրավ գրառումները` վերոհիշյալ անարդար եւ անհիմն «կարգալուծության» վճիռների և դրանց զոհ գնացած եկեղեցականների հետ առնչված:

Տեր Մարտիրոս Բերբերյան. «Սիրելինե՛ր, ապօրինի որոշումներուն ես անձնապէս չեմ ենթարկւում: Տէր Մարտիրոսը կը մնայ Քահանայ Յաւիտեան: Թեմական խորհուրդը պէտք է ընտրուի եւ ոչ թէ նշանակուի: Նոր նախիջեւանի եւ Ռուսաստանի թեմի թեմական խորհուրդը ապօրինի է, որովհետեւ չէ ընտրուած: Այն նշանակուած է առաջնորդի կողմէ իրեն ծառայող եւ իր խօսքը լսող մարդոցմով, որոնք նոյնիսկ չեն ճանաչում ինծի, եւ կ'երեւի` տարին մէկ կամ երկու անգամ կ'ուգան Պատարագի ցուցադրութեան համար: Թող բարձրեալն Աստուած ներէ իրենց, որովհետեւ, վստահ, առանց իմանալու նամակ են ստորագրել` առաջնորդի սուտ խօսքերուն հաւատալով: Ես կարծում եմ, որ սրանք չեն իմանում` ի՛նչ է Քահանայութիւնը. եթէ իմանային, այսպէս քայլեր չէին ըներ: Իրենց համար Եկեղեցին հիմնարկութիւն է, եւ քահանաները` աշխատողներ, առաջնորդը` ֆիլիալի տնօրէնը: Դրա համար ալ Քահանային հետ կը վարուին պաշտօնեայի պէս: Ձեր բոլորէն կը խնդրեմ` աղօթեցէ՛ք մեր կաթողիկոսի եւ սրբազանի համար, որ Աստուած իրենց հոգիները փոխէ, որովհետեւ ապօրինի կարգալոյծ անելով` իրենք Սուրբ Հոգիին դէմ մեղք գործեցին, որովհետեւ իմ ծառայութիւնը Քրիստոսի խօսքը տարածելն էր եւ մարդկանց գեհէնի կրակէն ազատելը: Այս ձեւով իրենք նպաստեցին սատանային: Աստուած օգնէ իրենց. ես վստահ եմ, որ իրենք այդ քայլին գնացին առանց իմանալու: Խնդիրն այն է, որ ով որ ասում է «անհարիր ընթացք» եւ ապօրինի կարգալոյծ է անում, պիտի խնդրէի իրմէ, որ կանգներ իջման Սեղանի առջեւ եւ քններ իր անձը ու Քրիստոսի առաջ ինք իրեն հարց տար, թէ արդեօ՛ք ինքը հարիր եկեղեցականի ընթացք եւ կեանք ունի: Ես 14 տարի անարծաթ ծառայել եմ, ստեղծել եմ հօտ, աղանդաւորներ դարձի եմ բերել եւ լիարժէք քահանայութիւն արել եմ: Կ'երեւի Հայ եկեղեցւոյ այսօրուայ ղեկավարութեան պէտք չեն այսպիսի քահանաներ»...

Համո Մոսկոֆյան. «Աստված պահապան, և լեզուները պապանձվեն Ձեզ չարախոսող ամբարիշտների: Մենք չենք թողնի, որ Հայ Առաքելական Սուրբ Եկեղեցին ոսկեպատ քրմերի ու մաֆիոզների որջ դառնա: Մեր Հայ Եկեղեցին սրբերի տաճար է: Տե՛ր Մարտիրոս, մենք քո վահանն ենք չարի թագավորության դեմ»:

Անահիտ Բաղրամյան. «Այո՛, որպես հավատարիմ ծառաներ` իրավունք չունենք լռելու: Տեր Մարտիրոսի նկատմամբ որոշումը պիղծ է, ինչպես պիղծ է և թեմական խորհրդի ընտրությունը: Մեկ ամիս առաջ եկեղեցու հավատացյալները ստորագրություններով նամակ գրեցին թեմի առաջնորդին՝ Եզրաս սրբազանին` խնդրելով «հանգիստ թողնել» ժողովրդին ու Աստծուն նվիրված ծառայող քահանային, ինչպես նաև հանդիպում ունեցան նրա հետ: Սակայն ինչպես համոզվեցինք, մեր հոգևոր առաջնորդներին է՛լ հավատացյալներ պետք չեն: Ես այսպիսի առաջնորդներից հրաժարվում եմ»:

Շողիկ Մանուկյան. «Մեր բոլորիս կողմից սիրելի Տեր Մարտիրոսը, «թեմական խորհրդի» «խնդրանքով», կարգալույծ է հռչակվել: Ժողովուրդը հարյուրավոր աջակցություն-նամակներ է գրում, իսկ թեմական խորհուրդը խնդրում է կարգալույծ անել: Նոր Նախիջևանի հայոց թեմի թեմական խորհուրդն արդյո՞ք ճանաչում է Տեր Մարտիրոսին, կամ ժողովուրդի կարծիքը հաշվի առե՞լ է: Եվ ո՞վ են այդ խորհրդի անդամները: Ավետարանն ասում է` եթե ձեռքդ գայթակղեցնում է, կտրի՛ր: Այսպիսի առաջնորդները ամբողջ մի ժողովուրդ են գայթակղեցնում: Իսկ մենք հասկանում ու տեսնում ենք ու լռե՞նք: Վաղը ինչպե՞ս պիտի կանգնենք Դատաստանի առաջ:»:

Ալլա Աթաբեկյան. «Տեր Մարտիրոսը հոգևոր մեծ Առաջնորդ է, և մեր հավատացյալների համար ոչ մի նշանակություն չունի, թե ինչ անարդար որոշում են կայացրել նրա վերաբերյալ: Մեր քահանան միշտ էլ մեզ համար կմնա մեր հոգևոր հովիվը: Շատ ցավում եմ, որովհետև հենց այսպիսի դեպքերում է, որ առաջանում են գայթակղություններ և մեր հավատացյալները հայտնվում են աղանդների թիրախում: Թող Աստված զորացնի՛ Ձեզ, սիրելի՛ քահանա: Ինչպես գիտեք, Աստծո հավատարիմ ծառաներն են, որ ենթարկվում են հալածանքների»:

Շաղիկ Գևորգյան. «Միայն այն, որ կարգալոյծ հռչակողը Գարեգին երկրորդն է, արդէն պարզ է, թէ ինչ մաքուր հոգեւորականներ են: Առաջինը պէտք է կարգալոյծ հռչակուի Գարեգին երկրորդը, իսկ երկրորդ պատուաւոր տեղը կարգալոյծ հռչակուելու պատկանում է հռչակաւոր բենթլիին (անունը չգիտեմ, ես իրեն բենթլի եմ ասում)»:

Արամ դպիր Դիլանյան. «Ցավում եմ, տե՛ր հայր, որ կատարեցին այդ ծայրահեղ քայլը: Ես ոչ մի պահ չեմ վստահում այն խոսքերին, որ կարդացի, իբրեւ թե, դուք անհարիր ընթացք եք ունեցալ: Անհարիր է Ձեզ նմանին կարգալույծ անելը:

Մերի Ավագյան. «Դէ հերի՛ք է, է՛լի, ինչքա՞ն կարելի է անհիմն, անձնական խռովվածության պատճառով կարգալույծ անել հոգևոր Հայրերի: Ժամանակն է խորհելու` գուցե դո՞ւք չեք լավ ղեկավար, որ նրանք չեն ենթարկվում, և ինչպես գրված է` «եկեղեցական ուխտը դրժում են»: Այս երկու Հայրերին չեմ ճանաչում, բայց անչափ տխրել եմ: Այդպես չի կարելի խաղալ ճակատագրերի հետ, այն էլ` հոգևոր նվիրյալների հետ»...

Մարտին Գևորգյան. «Սկսում եմ մտածել, որ Քրիստոսի իսկական ծառաների դեմ է այս կաթողիկոսը»:

Հակոբ Քավուրմաչյան. «Տէ՛ր Հայր, փառք տուր, որ ազատեցար այս մաֆիայի ձեռքէն: Դուն միշտ քահանայ ես մեզ համար: Կարգդ առին, բայց միռոնը քու վրադ է : Ասոնց պատիժը Տէրը պիտի տայ, հոգ մի՛ ըներ: Նոյնպէս հայր Մխիթարը լաւ հոգեւորական ըլլալու համար աբեղայ մնաց: Իսկ բանտ մտնողները եպիսկոպոս ձեռնադրուեցան: Այս կաթողիկոսին մաֆիային գլուխը նուէրն է, նոյնպէս` տիկին Լուիզ Սիմոնին»:

Հրաչյա Սուրեն. «Աս ի՞նչ սրիկայ կաթողիկոս է: Հայր Մխիթարը 30 տարիէ ի վեր կը ճանչնամ: Ինծի համար հիմա պէտք է ըլլար արքեպիսկոպոսներու շարքին: Այս ի՞նչ անիրաւութիւն է, չեմ հասկնար: Բանտ մտնողները եպիսկոպոս ձեռնադրուեցան, հայր Մխիթարը կարգալոյծ եղաւ. ասի արդարութի՞ւն է: Շա՛տ մեղք»:

Հեղինէ Ղազարեան. «Այսօր չարը աշխարհում այնքան է զորացել, որ սողոսկել է Հայ Առաքելական եկեղեցուց ներս և իր քամահրանքներն է թելադրում մեր հոգևոր հայրերին: Մոսկվայի հավատացյալ ժողովուրդը արթնության և զգաստության կոչ է անում մեր հոգևոր հայրերին` հանուն Հիսուս Քրիստոսի սուրբ չարչարանքների, հրաշափառ Հարության և Համբարձման, Աստվածային սիրով և գթասրտությամբ հովվելու Հայ առաքելական սուրբ եկեղեցին և հավատացյալ ժողովրդին: Այսօր անհիմն պատճառներով, մի գրչի հարվածով կարգալուծ են արվում շատ արժանավոր հոգևորականներ, որի կարիքը շատ ունի Հայոց եկեղեցին: Մենք` հավատացյալներս, մեր բողոքի ձայնն ենք բարձրացնում և աղոթում ենք առ Աստված, որ մեր Երկնավոր Հայրը խավարից դուրս հանի մեր Սուրբ Լուսավորչի հավատը, և թող որ անմեղ Քրիստոսներ քիչ խաչվեն: Սուրբ Լուսավորչի բարեխոսությանբ թող մեր Հայ առաքելական եկեղեցին դառնա այնպիսին, ինչպիսին հիմնել են Ս. Թադեոս և Ս. Բարդուղիմեոս առաքյալները: Մեր Սուրբ եկեղեցին բռնությունների, կամայականությունների, անձնական շահերի և ներկա-բացակաների եկեղեցի չէ: Մեր Սուրբ եկեղեցին աստվածապաշտության, աստվածասիրության, եղբայրասիրության, խոնարհության, համբերության և բարի գործերի, ծառայությունների եկեղեցի է: Մեր Սուրբ եկեղեցին Երկնքի Արքայությունն է երկրի վրա: Եվ այդ Սուրբ վայրում տեղ պիտի չգտնեն ոտնձգություններ, անձնական շահեր, բռնություններ: Ես ուզում եմ մեջբերել մեր Տիրոջ ավետարանական խոսքը. «Ինչո՞ւ քո աչքի գերանը չես տեսնում, իսկ եղբորդ աչքի շյուղը տեսնում ես: Հանի՛ր քո աչքի գերանը, և եղբորդ աչքի շյուղը չես տեսնի»: Մերկ եկել ենք այս աշխարհ, մերկ էլ գնալու ենք այս աշխարհից»: