Ապրիլի 28-ին, Ռուսաստանի և Նոր Նախիջևանի հայոց թեմի թեմական խորհրդի խնդրանքին ընդառաջ, Ն. Ս. Օ. Տ. Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի հայրապետական տնօրինությամբ կարգալույծ է հռչակվել Տ. Մարտիրոս քահանա Բերբերյանը եկեղեցականին անհարիր ընթացքի համար:

Նկատի ունենալով այն, որ նման պարագաներում ինչպես կարգալույծ եղածների, այնպես և «շահագրգիռ» այլ մարդկանց կողմից անհարկի շահարկումներ են կատարվում` հարկ ենք համարում այս առնչությամբ տեղեկացնել հետևյալը:

Ռուսաստանի և Նոր Նախիջևանի հայոց թեմի հոգևոր սպասավոր Տ. Մարտիրոս քահանա Բերբերյանը զբաղվել է գործարարությամբ, ինչը բացասաբար է անդրադարձել նրա հոգևոր ծառայության վրա և անառողջ մթնոլորտ ստեղծել նաև թեմից ներս: Տեր Հորը բազմիցս թեմի հոգևոր իշխանության կողմից այդ մասին նախազգուշացվել է, երեք և ավելի տարիներ նրա հետ աշխատանք է տարվել, սակայն եկեղեցականին անհարիր ընթացքը շարունակվել է: Ամիսներ առաջ կատարվել է Մարտիրոս քահանայի փիլոնազրկումը, ապա Մեծի Պահոց շրջանում` կախակայումը, հերթական անգամ հնարավորություն տրվել ինքնաանդրադարձի և սեփական ընթացքի սրբագրման:

Կարգալուծությունը վերջին հանգրվանն է եկեղեցականի հոգևոր ծառայության մեջ: Ցավալի է, որ Մարտիրոս քահանան ականջալուր չի եղել թեմակալ առաջնորդի և ապա Ամենայն Հայոց Հայրապետի հորդորներին` շարունակելով իր նախկին ընթացքը: Դատապարտելի է նաև կարգալուծությունից հետո Մարտիրոս Բերբերյանի` յաչս հավատացյալ ժողովրդի արդարանալու պատեհապաշտ սխալ կեցվածքը:

Տեղեկացնում է Մայր Աթոռ Սուրբ Էջմիածնի Տեղեկատվական համակարգի տնօրեն Տ. Վահրամ քահանա Մելիքյանը: