Լուսինե Փարսադանյան

Լոռու մարզի Թումանյան քաղաքն այս պահին 2200 բնակիչ ունի, որից 700-ը, Թումանյանի քաղաքապետ Լեւոն Զավարյանի տեղեկացմամբ, գործազուրկ է:

Նրանց մեջ մեծ թիվ են կազմում հատկապես տղամարդիկ: Թումանյանի քաղաքապետը նշում է, որ գործազրկությունը քաղաքը լքելու պատճառ չի դառնում: «Քաղաքում միայն 90-ականներին է արտագաղթ եղել, վերջին տարիներին արտագաղթ չի նկատվում: Վերջին մի քանի տարիներին աշխատատեղեր էլ են բացվել՝ հէկ է կառուցվել, գազալցակայան, քարի արտադրամաս, այժմ նաեւ՝ կարի արտադրամաս: Այս բոլորի օգնությամբ 40-ից ավելի մարդ կայուն աշխատանք ունի»:

Նշված չորս աշխատատեղերից վերջին՝ «Հույսի շող» կարի նորաբաց արտադրամասում 12 կին է աշխատանքով ապահովվել: Նրանց մի մասը ոչ միայն կրթություն, այլեւ աշխատանքային փորձ ունի այս բնագավառում: Արտադրամասն արդեն մի քանի պատվեր ունի Թումանյանից եւ այլ քաղաքներից: «Պատվերներ ունենք Սպիտակ, Վանաձոր քաղաքներից, Թումանյանի մանկապարտեզից: Կան նաեւ անհատական պատվերներ»,- ասում է «Հույսի շող» ՍՊԸ-ի տնօրեն Հրանուշ Աղամյանը: Վերջինիս խոսքով՝ իրենք առաջիկայում պատրաստվում են հագուստներ կարել: «Առաջիկայում կկարենք նաեւ տաբատներ, վերարկուներ: Պետք է աշխատենք տեսականին պարբերաբար նորացնել»,- ասում է Հրանուշ Աղամյանը:

Թումանյան քաղաքում նախկինում կարի արտադրամաս եղել է, որը 1993 թվականից, սակայն, դադարել է աշխատել: Գոհար Վահրամյանը նույնպես աշխատել է այդ արտադրամասում: Փակվելուց հետո այդ գործով տանն է զբաղվել: Ասում է՝ գոհ է, որ կայուն աշխատանք կունենա եւ իր ունեցած գիտելիքները սիրով կփոխանցի սկսնակ աշխատակիցներին: «Շուրջ քսան տարի է չեմ աշխատում,  ուրախ եմ, որ քաղաքում կարի արտադրամաս է բացվել»,- ասաց Գոհարը: «Հույսի շող» նորաբաց կարի արտադրամասի բացմումը տեղի կունենա հունիս ամսին: