Լուսինե Փարսադանյան

Տեղացող անձրեւները կրկին սկսել են անհանգստացնել բազմաբնակարան շենքերի վերջին հարկերում բնակվողներին: Ալավերդու Ջրավազան թաղամասի 60-րդ շենքի բնակչուհի Վարդիթեր Ծատինյանը անձրեւներից վնասված տան պատերը վերջերս է վերանորոգել, տանիքում էլ մասնակի վերանորոգում են կատարել բնակշահագործման տեղամասի աշխատակիցները, սակայն, պատերը նորից խոնավացել են: «Չգիտես ինչու, մուտքի ներքեւի հարկում ապրող բնակիչներին այս հարցը չի հուզում: Գումար հավաքելուց նրանք միանշանակ հրաժարվում են: Շքամուտքում կաթոցներ միշտ էլ լինում են ու շուտով խոնավությունը նորից տան պատերին կհասնի, բայց ես բնակարանս կրկին վերանորոգելու հնարավորություն չունեմ»,- ասում է Վարդիթեր Ծատինյանը:

Վերջինս այս շենքում բնակվում է շենքի շահագործելու առաջին օրից` 1962 թ.-ից: Նա ասում է, որ տանիքները վերանորոգելիս հաշվի չի առնվում շենքի հնությունը:

Տանիքների անբարեկարգ վիճակից բողոքում է նաեւ Ալավերդու մեկ այլ` Սանահին-Սարահարթ թաղամասի առաջին զանգվածի 17-րդ շենքի 5-րդ հարկի բնակչուհի Սաթենիկ Սոխակյանը, ով 10 տարի բացակայել է քաղաքից: Հիմա, երբ վերադարձել է, բնակարանն ամբողջությամբ խոնավացած ու անբարեկարգ է գտել: «Անձրեւաջրերի հետեւանքով բնակարանի հատակն էլ է փտել: Խոնավացել են տանը եղած բոլոր հագուսները»,- ասում է նա:

Ալավերդի քաղաքում 180 բազմաբնակարան շենք կա: Կառավարության Հրատապ ծրագրերի շրջանակներում 30 շենքի տանիք արդեն հիմնանորոգվել է: Այս տարի եւս, քաղաքապետարանը նույն գումարներով պատրաստվում է տանիքների հիմնանորոգման ծրագիր իրականացնել: Դիմումները բազմաթիվ են, սակայն, ընտրությունը կկատարվի ըստ առաջնահերթության՝ ծրագրում կընդգրկվեն ամենաանբարեկարգ ու ամենաշատ բնակեցված շենքերը:  Քաղաքապետարանում աշխատում են նաեւ նույն փուլում ընդգրկել տարբեր թաղամասերի շենքեր:

Այս պահին դեռեւս հստակեցված չէ, թե այս տարվա ծրագրում Ալավերդու ո՞ր շենքերի տանիքներն  են հիմնանորոգվելու: Կգործի նաեւ նախորդ տարիների կանոնը. այն է՝  յուրաքանչյուր ընտանիք պետք է  որոշակի  գումար ներդնի: Դա,  իհարկե,  հանվում է բնակարանների սպասարկման վարձերից: «Այս ձեւով մենք փորձում ենք բնակիչների մոտ սեփականատիրոջ զգացում արթնացնել: Հետագայում դա կբերի ավելի պարտաճանաչ վարքագծի ու հոգատար վերաբերմունքի»,- նշում է քաղաքապետը: Այս ծրագրի համար, թե որքան գումար կտրամադրվի` դեռեւս պարզ չէ: