Երևանի Րաֆֆու փողոցի 19 շենքին հարող կանաչապատ հողատարածքների սեփականաշնորհման փաստի առթիվ հարուցված քրեական գործով դեռևս մեղադրյալ չկա: Հիշեցնենք, որ հողամասերը օտարվել էին նախկին քաղաքապետեր Երվանդ Զախարյանի` 2009թ., Գագիկ Բեգլարյանի` 2010թ. որոշումներով:

«Հետքի» հարցմանն ի պատասխան` ոստիկանությունը տեղեկացնում է. «ՀՀ ոստիկանության քննչական գլխավոր վարչության Երևան քաղաքի քննչական վարչության ծանր հանցագործությունների քննության բաժնում քննվող հիշյալ քրեական գործով նախաքննությունը շարունակվում է»: Արդեն մոտ հինգ ամիս է, ինչ ընթանում է այս գործով նախաքննությունը:

Սեփականաշնորհված կանաչապատ հողատարածքները գտնվում են 19 շենքի դիմաց՝ 5-7 մետր հեռավորությամբ: Այդ տարածքները` երկու առանձին հողակտորներ, օտարվել են ոմն Դմիտրի Անդրիասյանի:

Շենքի բնակիչները չեն ճանաչում Դմիտրի Անդրիասյանին: Նա այդ շենքի բնակիչ չէ: Դեռ երկու տարի առաջ բնակիչները դիմում էին ուղարկել ՀՀ գլխավոր դատախազին՝ փաստարկելով, որ իրենց պուրակի սեփականաշնորհումն անօրինական է, և խնդրել էին հարուցել քրեական գործ:

Բնակիչների հաղորդումը դատախազությունից քննարկման էր ուղարկվել ոստիկանություն, սակայն քննչական գլխավոր վարչության՝ Երևանի ՔՎ կենտրոնականի քննչական բաժնի ավագ քննիչ Գայանե Երիցյանը որոշում էր կայացրել քրեական գործի հարուցումը մերժել` առանց հարցաքննելու տարածքները սեփականաշնորհած Դմիտրի Անդրիասյանին:

Բնակիչները քննիչի որոշումը բողոքարկել էին Կենտրոն և Նորք-Մարաշ վարչական շրջանների ընդհանուր իրավասության դատարան: Դատավորը 2013թ. նոյեմբերի 12-ին բնակիչների հայցը բավարարել է, եւ դրա արդյունքում հարուցվել է քրեական գործ:

Սեփականաշնորհման փաստաթղթերը կեղծված են: Ինչպես արդեն գրել ենք, կանաչապատ տարածքները սեփականաշնորհած անձը, ըստ փաստաթղթերի, նույն տարածքում ինքնակամ շինություններ է կառուցել այն ժամանակ, երբ եղել է 8 տարեկան: Մանրամասն` այստեղ: