«Հետք»-ի հարցերին պատասխանում է ԱԺ ԲՀԿ խմբակցության պատգամավոր Ռուստամ Գասպարյանը

- Երեկ ԱԺ-ում քվեարկության դրվեց «Կուտակային կենսաթոշակների մասին» կառավարության ներկայացրած նոր օրինագիծը, որին ձեռնպահ քվեարկեց ԲՀԿ խմբակցությունը: Տեսակետներ հնչեցին, թե կուսակցությունը քվեարկելիս կաշկանդված է եղել ԲՀԿ առաջնորդ Գագիկ Ծառուկյանի և ՀՀ վարչապետ Հովիկ Աբրահամյանի խնամիական կապի հանգամանքով: Դուք կաշկանդված եղե՞լ եք:

- Ոչ մի կերպ չի ազդել դա իմ քվեարկության վրա: Մի քանի օրինագծեր են եղել, որոնք կառավարությունը ներկայացրել էր ու մենք դրանց դեմ ենք քվեարկել, այնպես որ խնամիական բարեկամական կապերը գործ չունեն քաղաքականության մեջ:

- Այդ դեպքում ինչո՞ւ ձեռնպահ քվեարկեցիք, երբ ամիսներ շարունակ ԱԺ ոչ իշխանական չորս խմբակցությունների հետ միասին պայքարում էիք պարտադիր կուտակային կենսաթոշակային համակարգի դեմ:

- Դե դա մի քայլ առաջ էր, բարեփոխում էր, ուստի մենք կառավարությանը տվեցինք հնարավորություն, որ կարողանան աշխատել. շանս ենք տվել, որ աշխատեն: Մեր կուսակցությունը առաջիկայում էլ թեժ գիծ կունենա, որ քաղաքացիները զանգեն, եթե նրանց պարտադրում են վճարել, և մենք կօգնենք նրանց: Ունենալու ենք թեժ գիծ, որ ահազանգեն, զանգեն, տեղեկացնեն, մենք էլ զբաղվենք այդ հարցով:

- Պարոն Գասպարյան, քանի որ քառյակի համագործակցության առանցքում կուտակային կենսաթոշակային հարցի դեմ պայքարն էր, հնչեցին կարծիքներ, որ քառյակը տապալվեց, պառակտվեց, որովհետև չորսից երկուսը՝ ԲՀԿ-ն ու ՀՅԴ-ն, ձեռնպահ քվեարկեցին օրենքին:

- Չէ, ես նման բան չէի ասի: Բոլոր հարցերի հետ կապված մենք քառյակի հետ շարունակում ենք քննարկումներ տանել, շարունակում ենք համագործակցել:

- Կառավարության նոր ծրագրի շուրջ քառյակը միասնական դիրքորոշմամբ հանդես կգա՞:

- Հնարավոր է:

- Որպես ԲՀԿ-ական պատգամավոր` Դուք կողմ կլինե՞ք, որ նոր ծրագրի շուրջ չորս ուժերը մեկ դիրքորոշում հայտնեն:

- Եթե քառյակն այսօր համագործակցում է, ընդհանուր որոշման է հանգում, իհարկե կողմ եմ:

- Դուք անձամբ հակված եք կո՞ղմ, թե՞ դեմ քվեարկել կառավարության նոր ծրագրին:

- Կողմ, միանշանակ, չեմ քվեարկի:

- Դե՞մ եք քվեարկելու:

- Դե դա արդեն քննարկման խնդիր է:

- Ինչո՞ւ միանշանակ կողմ չեք քվեարկի:

- Յուրաքանչյուր կառավարության ծրագրի համար (դա լինի անցածը կամ հաջորդը, ինչքան որ ունեցել ենք) կարելի է կանգնել ու կես ժամ ծափահարել, բայց ինքներս տեսնում ենք, որ որևիցե ծրագիր չի իրականացվում: Հիմա այս ծրագիրն էլ (նկատի ունի Հովիկ Աբրահամյանի կառավարության ներկայացնելիք ծրագիրը- հեղինակ) ոչ մի բանով չի տարբերվի մնացածից: Պետք է լինի հնարավորություն, պայման, որ վարչապետը կարողանա իրականացնել այդ ծրագիրը:

- Ասացիք, թե Հ. Աբրահամյանի կառավարության ծրագիրը չի տարբերվի նախորդից: Այդ դեպքում ինչո՞ւ էր ԲՀԿ-ն կառավարությանն անվստություն հայտնում:

- Անվստահություն էինք հայտնում, որ բան փոխվի, բայց բան չփոխվեց:

- Ինչո՞ւ չի փոխվում: Ասում էիք, որ Տիգրան Սարգսյանի հրաժարականից հետո շատ բան կփոխվի:

- Դե երկիրը պիտի գումար ունենա, պիտի միջոց ունենա, որ ինչ-որ խնդիրներ, հարցեր կարգավորի, բայց դա չկա: Հիմա շատ բան չի փոխվել, բայց նախկին կառավարությունը (նկատի ունի Տիգրան Սարգսյանի կառավարությունը- հեղինակ) ավելի վատ էր, կոռումպացված էր ավելի, դե հիմա հույս ունենք, որ Հ. Աբրահամյանը դրանք կվերացնի: