Ազգային ժողովի պատգամավորների մեծ մասը տեղյակ չէ Վերնիսաժում տեղի ունեցած կրակոցներից, որի արդյունքում հրաձգության մեջ կասկածվող Գոռ Առաքելյանը՝ ԱԺ ԲՀԿ խմբակցության պատգամավոր Կարո Կարապետյանի փեսան, ձերբակալվել է: Պարզվում է, որ կան նաև ԲՀԿ խմբակցության պատգամավորներ, ովքեր հայտարարում են, թե տեղյակ չեն կրակոցներից, ուստի Կարո Կարապետյանի հետ էլ չեն զրուցել:

ԲՀԿ-ական Ստեփան Մարգարյանը «Հետք»-ի հետ զրույցում ասաց, թե ծանոթ չէ մանրամասներին:

«Որ չեմ տիրապետում, հիմա ինձ համար շատ դժվար է մեկնաբանել, մանրասներին ես չեմ ծանոթացել»,- հավաստիացրեց նա: Մեր հարցին, թե արդյոք չե՞ք զրուցել Կարո Կարապետյանի հետ, չէ՞ որ նրա բարեկամն է կրակել Մարգայանը զարմացավ. «Դու քո բարեկամների համար պատասխան տվե՞լ ես... Չէ, չեմ խոսել նրա հետ»:

Լյովա Խաչատրյանն էլ նշեց, որ չգիտի՝ ինչ է կատարվել Վերնիսաժում, ապա զարմացավ, թե ինչու ենք իրեն նման հարց տալիս, երբ ԱԺ-ում շուտով քննարկման է դրվելու նոր կառավարության ծրագիրը:

ԲՀԿ-ական պատգամավոր Գրիգոր Մարգարյանն էլ ասաց, թե կարծում է, որ տեղի ունեցածը շատ վատ դեպք է: «Փառք Աստծո, որ զոհեր չեն եղել: Այդ մարդկանց փոխարեն կարող էի լինել ես կամ իմ երեխան կամ դուք: Վստահ եմ որ անպայման պատշաճ մարմիններն այդ հարցը մինչև վերջ կտանեն»,- նշեց նա: ԲՀԿ պատգամավորի խոսքով՝ ինքը միջադեպից տեղյակ է այնքանով, որքանով ներկայացրել են լրատվամիջոցները, ապա նշեց, թե Կարո Կարապետյանի հետ դեռ չի հանդիպել:

Միջադեպից տեղյակ չէր նաև ՀՀԿ խմբակցության պատգամավոր Մհեր Սեդրակյանը: Պատասխանելով մեր հարցին, Մ. Սեդրակյանն ասաց, թե ինքը տեղյակ չէ կրակոցներից, որովհետև ծայրամասում է ապրում: «Ես ծայրամասում եմ ապրում՝ իմ ի՞նչին է պետք»,- ասաց նա: Երբ հետաքրքրվեցինք, թե արդյոք չե՞ք կարդացել, որ կրակոցներ են հնչել մարդաշատ վայրում, մարդիկ են վիրավորվել, ապա Մ. Սեդրակյանը կրկնեց. «Ես ծայրամաս եմ ապրում, ոչ մի բանի մասին չեմ էլ կարդում»:

ՀՀԿ խմբակցության պատգամավոր Մանվել Բադեյանն էլ նշեց, թե ինքը տեղյակ չէ՝ ինչ է կատարվել Վերնիսաժում, ովքեր են մեղավոր, ովքեր՝ պատասխանատու: Երբ հետաքրքրվեցինք, թե ի՞նչի հետևանք է նման միջադեպը, երբ օրը ցերեկով մարդկանց վրա կրակում են, Բադեյանը պատասխանեց. «Պատճառները տարբեր կարող են լինել, իսկ ընդհանրապես, դա մարդկային անդաստիարակության արդյունք է, երբ որ մարդիկ օրը ցերեկով կրակում են: Դա նշանակում է, որ պակաս դաստիարակություն է ստացել»: