Տեսանյութեր
Լուսանկարներ
Գորիսի քաղաքապետի թեկնածուներին դուրս մղեցին ընտրապայքարից
Սառա Պետրոսյան
Գրիշա Բալասանյան
Գորիսի քաղաքապետի թեկնածուներից Տիգրան Կարապետյանի լրատվության պատասխանատու Մհեր Քումունցը հաստատեց, որ Տ. Կարապետյանն այսօր հանել է թեկնածությունը: Նա չմանրամասնեց թեկնածուի հրաժարականի պատճառները` ասելով, թե առաջիկայում ավելի մանրամասն կներկայացնեն, սակայն նշեց, որ ճնշումներ են եղել թեկնածուի նկատմամբ:
Այսօր առավոտյան իր թեկնածությունը հանել է նաև քաղաքապետի թեկնածու Արա Բուդաղյանը: Վերջինիս օգնական Ռոբերտ Հակոբյանը «Հետքին» տեղեկացրեց, որ Բուդաղյանը թեկնածությունը հանել է մյուս թեկնածուին` Տիգրան Կարապետյանին, սատարելու համար, սակայն, վերջինս նույնպես այսօր հրաժարվել է ընտրապայքարից: Ռոբերտ Հակոբյանը բացառեց, որ Արա Բուդաղյանը հետ կվերցնի դիմումը: «Իմաստ չկա»,- ասաց նա և հավելեց, որ Գորիսում մարդիկ հիասթափված են ընտրական գործընթացից: Նրա ասելով` Արա Բուդաղյանը ճնշումների չի ենթարկվել:
«Վարարակն» ՓԲԸ տնօրեն Արա Բուդաղյանը, ով նույնպես ՀՀԿ անդամ է և ինքնաառաջադրվել էր Գորիսի քաղաքապետի ընտրություններին մասնակցելու համար, չէր բացառել, որ մինչեւ մայիսի 29-ը` թեկնածությունը հանելու օրենքով նախատեսված ժամանակը, կհրաժարվի հօգուտ Տիգրան Կարապետյանի:
«ԳԱՄՄԱ» ԲԲԸ գործադիր տնօրեն Տիգրան Կարապետյանը Գորիսի քաղաքապետի պաշտոնի ամենահավանական մրցակիցներից մեկն էր համարվում: Հայտնի է նաև, որ նա Սյունիքի մարզպետ Վահե Հակոբյանի մտերիմն էր և այդ հանգամանքը հույս էր ներշնչում, որ նա կարող էր մրցակցել ՀՀԿ անդամ, «Հայջրմուղկոյուղի» ՓԲԸ Գորիսի տեղամասի տնօրեն Վաչագան Ադունցի հետ, որին առաջադրել է ՀՀԿ Գորիսի շրջանային կազմակերպությունը: Հիշեցնենք, որ նրա ընտրությունը վստահված է Սյունիքի նախկին մարզպետ Սուրեն Խաչատրյանին:
Սյունիքի մարզպետ Վահե Հակոբյանը լրատվամիջոցներից չթաքցրեց, որ քաղաքապետի թեկնածու Տիգրան Կարապետյանն իր ընկերն է, նաեւ հորդորել էր քաղաքական ենթատեքստ չտալ հարցին: «Մենք ընկերներ ենք և ես հպարտանում եմ իրենով»,- ասել էր մարզպետը: Անդրադառնալով համայնքի ղեկավարի ընտրություններին, դեռևս մայիսի 8-ին նա նշել է, թե «այս պահին առաջադրված թեկնածուների միջև լարվածություն չկա, բայց և «պատրաստ ենք ցանկացած զարգացումների»:
Նշված երեք թեկնածուների կողքին քննարկումներից դուրս է մնացել չորրորդ թեկնածուն` Հրայր Յոլյանը, ով նաև Գորիսի ավագանու անդամ է և գործող քաղաքապետին ոչ թափանցիկ գործունեության համար մեղադրողներից մեկը: Ամենայն հավանականությամբ, գործող իշխանությունը նրա անձով էլ կապահովի հունիսի 8-ին կայանալիք Գորիսի քաղաքապետի ընտրությունների ժողովրդավարության պատրանքը` նրան մրցակցության մեջ թողնելով Սուրեն Խաչատրյանի պաշտպանությունը վայելող ՀՀԿ անդամ Վաչագան Ադունցի հետ:
Առաջին լուսանկարում` Տիգրան Կարապետյան
Մեկնաբանություններ (5)
Մեկնաբանել