Այսօր առավոտյան մեկնարկեց Հանրապետական կուսակցության հերթական` 15-րդ համագումարը: ՀՀ նախագահ, կուսակցության ղեկավար Սերժ Սարգսյանը ժամանեց Մարզահամերգային համալիր, որտեղ անցկացվում է համագումարը: Ս. Սարգսյանին դիմավորեցին ՀՀ վարչապետ Հովիկ Աբրահամյանը, ԱԺ նախագահ Գալուստ Սահակյանը, նաև` ՀՀ նախկին վարչապետ Տիգրան Սարգսյանը: Վերջինս անպատասխան թողեց լրագրողների բոլոր հարցերն իր հրաժարականի վերաբերյալ: «Ես ներողություն եմ խնդրում»,- ասաց Տիգրան Սարգսյանը:

Նախկին վարչապետին օգնության հասավ գործող վարչապետ Հովիկ  Աբրահամյանը։ «Ինչ ասել եք, պատասխանել եմ, հիմա Տիգրան Սուրենիչն իր գործն արել, գնացել է, ի՞նչ եք ուզում»,- Տիգրան Սարգսյանի լռությունն այսպես մեկնաբանեց Հովիկ Աբրահամյանը: Լրագրողները շարունակում էին հարցեր ուղղել Տ. Սարգսյանին այն մասին, թե որտե՞ղ է պատրաստվում աշխատել, ի՞նչ գնահատական կտա կառավարության ծրագրին և այլն: Բայց Տ. Սարգսյանը կրկին ներողություն խնդրեց և ասաց, որ հարցերին կպատասխանի հետո, թե ե՞րբ, չնշեց: Հովիկ Աբրահամյանը նորից միջամտեց՝ նշելով. «Ի՞նչ եք ուզում, չեմ հասկանում, մարդը հինգ անգամ ներողություն է խնդրում, նորից ճնշումներ եք գործադրում, հետո էլ խոսում եք իշխանություների ճնշումների մասին»։