Հոկտեմբերի 17-ին թիվ 41 ընտրատարածքային ընտրական հանձնաժողովին ինքնաբացարկի  դիմում է գրել Իջեւանի քաղաքապետի թեկնածու Արծրունի Ղալումյանը: Նա ՀՀԿ անդամ է, այդ կուսակցության Իջեւանի քաղաքային կառույցի ղեկավարը:

Ա. Ղալումյանը Տավուշի մարզպետ, ՀՀԿ մարզային կառույցի ղեկավար Արմեն Ղուլարյանի խնամին է: Հավանաբար  նա իր ցանկությամբ չէ հրաժարվել ընտրապայքարին մասնակցելուց:

Նոյեմբերի 13-ին կայանալիք Իջեւան համանքի ղեկավարի ընտրություններին մասնակցելու դեպքում Ա. Ղալումյանը լուրջ մրցակից կդառնար Իջեւանի քաղաքապետ, այս տարվա գարնանը ՀՀԿ-ին անդամագրված Վարուժան Ներսիսյանի համար, ով քաղաքը ղեկավարում է  1999 թվականից:  Իրազեկ աղբյուրների կարծիքով,  Արծրունի Ղալումյանի ինքնաբացարկը կապված է իջեւանյան ընտրապայքարին Հայաստանի նախկին նախագահ Ռոբերտ Քոչարյանի միջամտելու  հետ: Այժմ Իջեւանի քաղաքապետի թեկնածուները 3-ն են` ԲՀԿ անդամ, Իջեւանի ավագանու անդամ Վարդան Ղալումյանը, Իջեւանի քաղաքապետ Վարուժան Ներսիսյանը եւ քաղաքապետի տեղակալ, անկուսակցական Կարեն Օթարյանը: