Այսօր լրանում է «Գրավիր Ուոլ սթրիթը» ակցիայի 32-րդ օրը: Բողոքի ակցիաները տարածվում են ողջ աշխարհով՝ տպավորություն ստեղծելով, որ ողջ աշխարհում են դժգոհ տնտեսության վիճակից:

Բայց արդյոք հիմնականում առանց առաջնորդի կազմակերպվող բողոքի ակցիաները երկա՞ր կշարունակվեն: Ոչ ոք չի կարող հաստատ ասել: Սակայն ըստ դիտորդների՝ «Գրավիր Ուոլ սթրիթը» կարգախոսի ներքո կազմակերպված բողոքի ակցիաներն արդեն իսկ հասել են բավականին անսպասելի մասշտաբների:

 «Սա շատ ավելի առաջ է գնացել, քան ես կարող է կանխորոշել: Զարմանալի է, որ շարժումն այսքան տևեց: Այն, ինչ տեսնում ենք, աննախադեպ է»,- CNN-ին ասել է Միչիգանի համալսարանի քաղաքագետ Մայքլ Հինեյը, ով մասնագիտանում է սոցիալական շարժումների և ԱՄՆ քաղաքականությունը կազմակերպելու խնդիրների մեջ:

Շաբաթ և կիրակի օրերին Վաշինգտոնում ձերբակալվել է ևս 19 մարդ: Ավելի քան 90 մարդ մնում է Նյու Յորքի ոստիկանության հսկողության տակ: Բազմաթիվ մարդիկ են ձերբակալվել Չիկագոյում:

ԱՄՆ-ի սահմաններից դուրս բողոքի ակցիաներ են տեղի ունենում Լոնդոնում, Փարիզում, Հռոմում և Եվրոպայի մյուս երկրների մայրաքաղաքներում: Երթեր են անցկացվել նաև Ասիայի, Հարավային Ամերիկայի երկրներում և Ավստրալիայում:

Ցուցարարներն իրենց բողոքի մի շարք պատճառներ են նշում: Այնուամենայնիվ, մարդկանց փողոց դուրս բերած հիմնական խնդիրն է կորպորատիվ, ֆինանսական ու քաղաքական վերնախավից դժգոհությունն ու նրանց նկատմամբ զանգվածների զայրույթը:

Լուսանկարը՝ flickr.com կայքից