Լուսինե Փասադանյան

Շնող գյուղում Ասիական զարգացման բանկի ֆինանսավորմամբ խմելու ջրի ներքին ցանցի կառուցման աշխատանքներն արդեն ավարտական փուլում են: Աշխատանքներն իրականացնող «Շինաշխարհ» ՍՊԸ-ի աշխղեկ Արամ Սաֆարյանի խոսքով՝ այս ընթացքում կառուցվել է մոտ 6 կմ պոլիէթիլենային խողովակներով ջրագիծ, տեղադրվել են ջրաչափերի համար նախատեսված դիտահորեր:

«Հայջրմուղկոյուղու» Ալավերդու տեղամասի աշխատակիցներն արդեն կատարել են ջրագծի միացման աշխատանքները: «Հայջրմուղկոյուղու» Ալավերդու տեղամասի շահագործման բաժնի պետ Սամվել Սոխակյանը նշում է, որ ջրաչափերը  կտեղադրվեն ոչ թե բնակիչների տներում, այլ մայր ջրատարի ու դեպի տուն գնացող խողովակի սահմանազատման հատվածում: «Ջրաչափեր ձեռքբերելը եւ դեպի տուն գնացող խողովակների կառուցումը բնակիչների պարտականությունների մեջ է մտնում: Այս բոլորից հետո արդեն բնակիչները բաժանորդագրվելու համար պետք է պայմանագրեր  կնքեն «Հայջրմուղկոյուղի» ընկերության հետ»,- ասում է Սամվել Սոխակյանը: 

Ծրագրի ավարտից հետո, սակայն, խմելու ջուրը հասանելի կլինի գյուղի 50%-ին: «Լոռի բերդի» ջուրն ինքահոս է եւ ավելի բարձր հատվածներ հասնել չի կարող: Այդ հատվածների բնակիչների տներ ջուրը կհասնի պոմպակայանի օգնությամբ միայն»,- ասում է վերջինս: Այն, որ գյուղի միայն 50%-ը կարող է այս ծրագրից հետո ջուր ունենալ, արդեն իսկ բնակիչների դժգոհությունն է առաջացրել: 

Համայնքապետ Հովիկ Սահակյանը նշում է, որ գուղի բյուջեով, որը տարեկան կազմում է 83 մլն դրամ, անհնար է պոմպակայն կառուցել: «Բյուջեի միայն 72%-ը կազմում է համայնքապետարանի ու նրա ենթակա հիմնարկների՝ մանկապարտեզի, մանկական արվեստի դպրոցի ու մշակույթի տան աշխատակիցների աշխատավարձերը»: Հովիկ Սահակյանի խոսքով՝ պոմպակայանի կառուցումը հրատապ լուծում պահանջող հարց է: Ուստի, նպատակ ունեն եկող տարի գյուղում պոմպակայան կառուցել, որի միջոցով հնարավոր կլինի ջուրը հասցնել մինչեւ գյուղի ամենաբարձր կետը: Այս դեպքում ջուր կստանա ամբողջ գյուղը:  «Այս ուղղությամբ մենք արդեն քայլեր ենք ձեռնարկում, հարցը լուծելու ելքեր ենք փնտրում: Մարզպետ Արթուր Նալբանդյանի օգնությամբ հանդիպել ենք «Հայջրմուղկոյուղի» ընկերության տնօրենի հետ: Նրանք մեզ խոստացել են մասնագիտացված խումբ ուղարկել Շնողում ուսումնասիրություն կատարելու համար, որից հետո արդեն պոմպակայան կառուցելու ծրագիր կմշակվի»,- նշում է համայնքապետը:

Վերջինս հայտնեց, որ այս տարվա բյուջեով նախատեսում է ջրի նախկին խողովակների մասամբ վնասված հատվածնում վերանորոգում կատարել: «Եթե նույնիսկ ամբողջ գյուղում նոր խմելու ջրագիծ կառուցվի, մենք շարունակելու ենք նախկին ջրագիծը շահագործել՝ թեկուզ միայն ոռոգման նպատակով»,- ասաց Շնողի համայնքապետը: