ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Հայաստանի Հանրապետությունում Շվեյցարիայի Համադաշնության դեսպան Լուկաս Գասերին:

Զրուցակիցները քննարկեցին երկկողմ համագործակցությանն առնչվող հարցեր: Փոխվարչապետն արդյունավետ համարեց  Շվեյցարիայի կառավարության աջակցությամբ Հայաստանի մարզերում իրականացված ծրագրերը՝ մասնավորապես առանձնացնելով սոցիալական բնակարանաշինության, գյուղական համայնքների, զբոսաշրջության զարգացման ուղղություններով կատարված աշխատանքները:

Նա  նաեւ  շնորհակալություն հայտնեց Շվեյցարիայի զարգացման եւ համագործակցության գործակալության (SDC) կողմից Հայաստանի տարածքային զարգացման  նոր հիմնադրամի վերակազմավորման  եւ կայացման գործընթացին աջակցելու եւ այդ նպատակով դրամաշնորհային միջոցներ հատկացնելու համար: Կողմերն ընդգծեցին նոր հիմնադրամի դերը տարածքների սոցիալ-տնտեսական զարգացման գործում:

Քննարկվեցին նաեւ մարզերում իրականացվելիք զարգացման ծրագրերին  շվեյցարական կողմի մասնակցությանն առնչվող հարցեր: Մասնավորապես` անդրադարձ եղավ Համաշխարհային բանկի աջակցությամբ Հայաստանի հարավային մարզերում զբոսաշրջային ենթակառուցվածքների զարգացման ծրագրին Շվեյցարիայի կառավարության կողմից օժանդակության հնարավորություններին: Այս մասին հայտնում է ՀՀ ՏԿՆ-ն: