HY RU EN

Անի Հովհաննիսյան

Երեկ ոստիկանի կողմից բռնության ենթարկված քաղաքացու դատաբժշկական փորձաքննությունը ձգձգում են

Էլեկտրաէներգիայի սակագնի դեմ պայքարի դուրս եկած եւ ոստիկանության կողմից բռնությունների ու ծեծի ենթարկված քաղաքացիները հաղորդում են տվել հանցագործության մասին: Ինչպես վկայում են դեպքի հետ առնչվող տեսաձայնագրություններն ու լուսանկարները՝ ոստիկաններն այնքան ուժեղ են սեղմել Արա Ղարագյոզյանի քունքերին, որ վերջինս ուշագնաց է եղել, այնուհետեւ ուշքի գալով՝ տեղափոխվել Մասիվի հիվանդանոց: Հիվանդանոցում նա մնացել է մոտ 3 ժամ, ստացել 6 ներարկում, բայց ինչպես ինքն է նշում, դեռեւս թուլություն եւ գլխացավեր ունի:

Արա Ղարագյոզյանն այսօր այցելել է 1-ին հիվանդանոց՝ դատաբժշկական փորձաքննության, որտեղ նրան մերժել են հետազոտել. «Պատճառաբանեցին, որ Մասիվի հիվանդանոցում ստացիոնար բուժման փաստաթղթերն իրենք չունեն եւ չեն կարող փորձաքննության ենթարկել, մինչեւ չունենան այդ փաստաթղթերը: Ես կապվեցի հետաքննիչ Ա. Առուստամյանի հետ, ով փորձեց խոսել դատաբժշկի հետ, որ այս վիճակում ստուգի: Դատաբժիշկը հրաժարվեց, հետաքննիչն էլ ինձ ասաց, որ իրենք պետք է գրություն պատրաստեն, ուղարկեն հիվանդանոց, որից հետո նոր կարող եմ փորձաքննություն անցնել: Հետաքննիչն ասաց, որ դա կարող է տեւել 1-2 օր»,- ասում է Արա Ղարագյոզյանը:

Ղարագյոզյանը կարծում է, որ ոստիկանությունը դիտմամբ հետաձգում է դատաբժշկի փորձաքննությունը, քանի որ այսօր 2-րդ օրն է, իսկ եւս 1-2 օր ուշացնելու դեպքում՝ հետքերը կարող են վերանալ. «Ըստ քրեական դատավարության օրենսգրքի՝ դատաբժշկական փորձաքննությունը անհետաձգելի քննչական գործողություն է եւ հետաքննիչը անհապաղ պետք է փորձաքննություն նշանակի: Մինչեւ օրս ինձ չի հետազոտել դատաբժիշկը եւ դեռ երկու օր էլ փորձում են հետաձգել: Ես համարում եմ, որ սա դիտմամբ է արվում՝ հետքերը վերացնելու համար»,- ասում է բռնության ենթարկված քաղաքացին:

Լուս.՝ Նազիկ Արմենակյանի

Ոստիկանների կողմից ծեծի ենթարկված Արա Ղարագյոզյանն իր խոսքն է ուղղում ոստիկանապետ Վլադիմիր Գասպարյանին եւ գլխավոր դատախազ Գեւորգ Կոստանյանին՝ նշելով. «Անընդհատ Վովա Գասպարյանն ասում է, որ ոստիկանները մեր պաշտպաններն են, բայց երեկ մենք տեսանք ճիշտ հակառակը: Ոստիկանները միայն խոշտանգելով ու բռնություն գործադրելով են զբաղված»,- ասում է նա:  

Հ. Գ. Մոտ մի ժամ առաջ մարդու իրավունքների պաշտպանի աշխատակազմի աշխատակիցների ուղեկցությամբ Արա Ղարագյոզյանը անցել է դատաբժշկական փորձաքննություն: