![](/static/articles/55/41/l-6SfCBaWSHk.jpg)
Եթե Գագիկ Ծառուկյանը համարձակություն ունենա
ՀՀԿ-ի եւ ԲՀԿ-ի միջեւ վերջին ժամանակներում ծավալված իրադարձությունները տարաձայնություն անվանելը քիչ է ասված: Այս կարծիքին է Քաղաքագետների միության նախագահ Հմայակ Հովհաննիսյանը:
Նա «Հետքի» հետ զրույցում կարծիք հայտնեց, որ Հանրապետական կուսակցությունն արդեն 15 տարի ամեն կերպ փորձում է պահել քաղաքական մենաշնորհը: Սկզբում ՀՀԿ-ն «Միասնություն» դաշինքի «վերջը տվեց»՝ ՀԺԿ-ին մղելով փողոց, իսկ հետո ամբողջական իշխանությունը վերցրեց իր ձեռքը:
«Հենց այդ ժամանակվանից էլ Հանրապետական կուսակցությունը չի հանդուրժում իշխանությունը կիսել որեւէ այլ ուժի հետ: Իսկ եթե քաղաքական ուժի հետ էլ դաշինք կամ կոալիցիա է կազմում, ապա դա անում է միայն այն պատճառով, որ քաղաքական ուժի ուսերին բարդի պատասխանատվության մի մասը, բայց իրական իշխանությունն ամբողջական պահի իր ձեռքում եւ չկիսվի ոչ մեկի հետ: Հանրապետական կուսակցության այս մոտեցումը միանշանակ դատապարտում եւ սպառնում է կոալիցիային կամ ձեւական գոյության, կամ էլ կբերի բացահայտ ապահարզանի»,-ասում է Հմայակ Հովհաննիսյանը:
Ըստ նրա՝ քաղաքական հավերժական մենաշնորհը աշխարհը չի ընդունում, եւ կգա մի ժամանակ, որ ՀՀԿ-ն կամ գիտակցաբար կհրաժարվի մենաշնորհից՝ պահելով իր կշիռը, կամ էլ կլինեն լուրջ ցնցումներ եւ ներքեւից կպարտադրեն հրաժարվել դրանից, ինչի արդյունքում լիովին կկորցնի իր ազդեցությունը եւ կմղվի լուսանցք:
Հարցին, թե առանց կոալիցիայի ԲՀԿ-ն կարո՞ղ է գալիք ընտրություններում միայնակ հաղթանակ տանել, Հմայակ Հովհաննիսյանը պատասխանեց՝ միանշանակ այո:
Նրա կարծիքով՝ եթե այժմ Գագիկ Ծառուկյանին դուրս մղեն կոալիցիայից եւ սկսեն ճնշել, ապա այս սոցիալ-տնտեսական իրավիճում նա կհայտնվի նույն այն վիճակում, ինչ տարիներ առաջ Ռուսաստանի նախկին նախագահ Բորիս Ելցինը:
«Գագիկ Ծառուկյանը կարող է դառնալ ազգային հերոս, քաղաքական մեծություն եւ կարող է շատ մեծ վերելքների հասնել, եթե, իհարկե, նրա համարձակությունը, խիզախությունը հերիքի եւ գնա այն ճանապարհով, որով տարիներ առաջ գնաց Ելցինը՝ պայքարելով կոմկուսի կուսակցական մենաշնորհի դեմ: Ժողովուրդն այսօր մերժում է, հոգնել է Հանրապետականի 15-ամյա իշխանությունից եւ փախչում է երկրից, որպեսզի ազատվի Հանրապետականի իշխանությունից»,- ավելացրեց Հմայակ Հովհաննիսյանը:
Եթե ՀՀԿ-ն Հմայակ Հովհաննիսյանից խորհուրդ հարցներ, ապա վերջինս կասեր, որ քարերը փեշերից թափեն եւ ամեն կերպ Գագիկ Ծառուկյանի հետ «յոլա գնան», նրան համոզեն, որ մնա կոալիցիայում:
Մեկնաբանություններ (4)
Մեկնաբանել