Մարիամ Խալաթյան

Այն, որ Շիրակի մարզի համայնքներում կառավարության խոստացած բնակարանաշինության ծրագիրը չի շարունակվելու՝ պարզ էր դեռեւս 2013թ-ի ամռանը, երբ Գյումրու Անի թաղամասին հարող շինհրապարակն այդպես էլ դատարկ մնաց: Անօթեւանների համար բնակարանաշինություն իրականացնող «Գլենդել հիլզ» կազմակերպությունից հնչած տարաբնույթ խոստումները իրականություն չդարձան նաեւ այս տարի:

Քաղաքաշինության նախարար Նարեկ Սարգսյանի փոխանցմամբ մինչեւ հաջորդ տարեվերջ ավարտին կհասցվեն Ախուրյանում արդեն երկրորդ տարին կիսավարտ թողած երեք բազմաբնակարանների շինարարությունը: Նախնական տվյալներով Գյումրիում բնակարանաշինություն չի սկսվի եւ ամենայն հավանականության անօթեւան ընտանիքներին կառաջարկվեն պատրաստի բնակարաններ, որոնք նրանց համար ձեռք կբերի պետությունը:

«Բնակարանների գնման վկայական» ծրագրի տարբերակը կառավարությունը չի կիրառի՝ նախորդ տարիների փորձը հաշվի առնելով: Նախկինում վկայականով հատկացված գումարները բնակիչները ոչ միշտ էին ծառայեցրել նպատակին՝ կատարելով բնակարանների կեղծ առք ու վաճառք: Շատերն էլ երկար փնտրտուքից հետո այն հետ էին վերադարձրել՝ չգտնելով տրված գումարին համարժեք բնակարան: Ըստ պատասխանատուների, կառավարության նոր մարտավարությունը կնպաստի Գյումրու անշարժ շուկայի աշխուժացմանը: