«Չորրորդ ինքնիշխանություն». Ղարաբաղի մասին երգից նյարդայնացել են
Օրերս Երևանում տեղի ունեցավ Անկախ պետությունների համագործակցության (ԱՊՀ) մասնակից պետությունների ներքին գործերի նախարարների հերթական նիստը: Ինչպես հայտնի է, Երևան ժամանած պաշտոնյաների թվում էր նաև Ադրբեջանի ներքին գործերի նախարար Ռամիլ Ուսուբովը:
«ՉԻ» տեղեկություններով` բավականին հետաքրքիր միջադեպ է տեղի ունեցել այդ հավաքի ոչ պաշտոնական մասում: Բանն այն է, որ ԱՊՀ երկրների ներքին գործերի նախարարներին ՀՀ ոստիկանապետ Ալիկ Սարգսյանը հրավիրել է ռեստորան` շքեղ ընթրիքի: Ուրախ ժամանցը երգ ու պարով ապահովելու համար ՀՀ ոստիկանությունը հրավիրել է նաև հայկական շոու բիզնեսի որոշ ներկայացուցիչների:
Եվ ահա նրանցից մեկը` Վարդան Բադալյանը, որը ծնունդով Ղարաբաղից է, սկսել է երգել իր ալբոմից մի երգ, որը նվիրված է Ղարաբաղին: Կրկներգից, որտեղ անընդհատ հնչել է Ղարաբաղ բառը, ադրբեջանական պատվիրակության ախորժակը կտրուկ փակվել է:
Նրանք պարզապես ցած են դրել դանակ-պատառաքաղները և ակնհայտ դժգոհությամբ սկսել են բաձրաձայն բողոքել կատարվածից: ՀՀ ոստիկանապետն ու նրա շրջապատը ընկել են անհարմար դրության մեջ ու ստիպված են եղել հորդորել, որ ոչ մի քաղաքական «նամյոկ» չկա, պարզապես երգիչը հենց այդ երգն է ընտրել իր երգացանկից:
Մեկնաբանել