Նոռա Անանյան

«Հետքը» ընթերցող Անահիտ Ղուկասյանից նամակ էր ստացել, որտեղ վերջինս նշում էր թիվ 58 երթուղու ավտոբուսներից մեկի նստարանների անբարեկարգ վիճակի մասին: Նամակին կից Անահիտ Ղուկասյանը ներկայացրել էր նաև մաշված և պատառոտված նստարաններով սրահի լուսանկարները:

Ավտոբուսի նման վիճակի պատճառները պարզելու համար զրուցեցինք երթուղուց արդեն մոտ 1 տարի օգտվող Աննայի հետ: «Պարզապես անհնար է օգտվել այս ավտոբուսից, տհաճ է անգամ նստել այս նստարաններին, չնայած՝  ում կարող է հաճելի լինել այս վիճակը: Ես հույս էլ  չունեմ, որ օրերից մի օր այն սարքին և պատշաճ տեսք կունենա»:

Մեզ հետ զրույցում, սակայն, վարորդ Գագիկ Սահակյանը նշեց, որ երթուղին սպասարկող ավտոբուսների սրահներն այժմ վերանորոգվում են:

«Որ ես էլ չասեմ, գիտեք, շատ «նուրբ» ժողովուրդ ունենք: Ջարդում, փշրում, ճղում, գրում են ու չեն մտածում, որ էլի իրենք են օգտվելու ավտոբուսից. հետո էլ կբողոքեն, թե վատ վիճակում է գտնվում  ավտոբուսը: Իսկ ամեն մի սրահը վերանորոգելու համար 200.000 դրամից ավելի գումար է ծախսվում: Ամիսը մեկ հո չեն կարող վերանորոգել: 80%-ով ուղևորների մեղքով է սրահն այս վիճակում»,- ասաց Գագիկ Սահակյանը: 

Երթուղին սպասարկող «ՍԱՔ-ԽԱՉ» ՍՊԸ-ի փոխտնօրեն Արմեն Քերոբյանը նման վիճակի համար նույնպես մեղադրեց ուղևորներին: 

«Վերանորոգման աշխատանքներ մենք անցած տարի էլ ենք կատարել, իսկ նստարաններն այդ վիճակում են հայտվել ուղևորների անփույթ վերաբերմունքի արդյունքում` բռնվելու տեղը թողած, նստարաններից են բռնվում: Այդ պատճառով այս տարի աշխատանքները կատարվել են մի փոքր այլ եղանակով, ինչպես նաև ավելի ամուր կտորներ են օգտագործվել: 18 մեքենայի համար ծախսվել է մոտ 3.800.000 դրամ. 10 ավտոբուսի սրահ արդեն  վերանորոգվել է»:

Արմեն Քերոբյանը հավաստիացրեց, որ մինչեւ սեպտեմբեր վերանորոգման աշխատանքներն արդեն ավարտված կլինեն: