Արտադրական վթար՝ Ալավերդու պղնձաձուլարանում
Վերջին մի քանի օրերին երեկոյան Ալավերդու փողոցներում քայլելը կրկին դարձել է անհնարին: Այսօր՝ ժամը 18:00-18:30 –ին էլ ալավերդցիները քաղաքի Ս.Սարահարթ թաղամասի փողոցներում քայլում էին՝ թաշկինակներով քթանցքներն ու բերանները փակած: «Գիշերը՝ ժամ 1:40-2:00-ին, պղնձաձուլական գործարանից ուժեղ պայթյուններ են լսվել Ս.Սարահարթ թաղանասի 2-րդ զանգվածում»,- «Հետքին» այսօր տեղեկացրեց Ալավերդու «Օրհուս» կենտրոնի համակարգող Անուշ Էվոյանը, ով ապրում է 2-րդ զանգվածի շենքերից մեկում:
Պայթյունները խուճապ են առաջացրել 2-րդ զանգվածի բնակելի շենքերի բնակիչների շրջանում. «Սարսափելի էր, խուճապահար ամբողջ ընտանիքով արթնացանք և երկար ժամանակ, հատկապես երեխաները չէին կարողանում քնել»,- ասաց թաղամասի բնակչուհի Քրիստինե Իսոյանը:
Գործարանի պայթյունների ձայնը հասանելի է եղել նաև քաղաքի Սպանդարյան, Զորավար Անդրանիկի այլ թաղամասերում: Արտանետումների վերջին օրերի մեծ ծավալի մասին «Արմենիան քափըր փրոգրամ» ընկերությունը բնակչության շրջանում պաշտոնական որևէ բացատրություն չի տարածել: Այսօր երեկոյան գործարանի 20 մետրանոց խողովակի արտանետումների մեծ հոսքի պատճառով Կոշաբերդ սարը ծխի մեջ չէր երևում: Ալավերդիում շատերը ենթադրում են, որ ձուլարանում միաժամանակ գործարկվում են երկու վառարանները:
Ստեղծված վիճակի մասին մեր հարցմանը քաղաքապետ Արտավազդ Վարոսյանը նշեց, որ իր կարծիքով պղնձաձուլական գործարանի արտանետումներում բան չի փոխվել, նույնն է մնացել: Սակայն մեր հեռախոսազանգից հետո քաղաքապետը գործարանի տնօրինությունից պարզեց, որ երեկ կեսգիշերի պայթյունները եղել են պղնձաձուլական գործարանի արտադրական վթարի հետևանք:
«Ասում են՝ ձուլարանի վառարանից շլակը փախել է, դա արտադրական պրոցեսում պատահող երևույթ է»,- բացատրեց քաղաքապետը:
Վերջինս տեղյակ էր, որ գիշերվա պայթյուններից հետո ալավերդցիների շրջանում խուճապ է առաջացրել նաև այսօր առավոտյան Ալավերդու «Մետալուրգ» մարզադաշտում վայրէջք կատարած ուղղաթիռը: «Այդ ուղղաթիռով կանադացի ներդրողներ են եկել պղնձաձուլական գործարան: Ամենայն հավանականությամբ Ալավերդու պղնձաձուլական գործարանը կդառնա Հայաստանի պղնձի կենտրոնացված արտադրավայր` իհարկե, տեխնիկական վերազինումից հետո»,- ասաց Արտավազդ Վարոսյանը:
Մեկնաբանել