Երեկ Լոռու մարզպետ Արթուր Նալբանդյանը Թումանյանի տարածաշրջանի համայնքների բնակիչներին ընդունեց Ալավերդի քաղաքում: Բնակիչների պահանջներն այնքան էլ տարաբնույթ չէին. դրանք հիմնականում ունեին սոցիալական ուղղվածություն: Ընդունելության ընթացքում ակնհայտորեն բացահայտվում էր տարածաշրջանի բնակչության սոցիալական աղետալի վիճակն ու բնակչության անապահով շերտերի անպաշտպանվածությունը:  

«Շուտով կլրանա երեք տարին, որ չեմ աշխատում, որտեղ դիմում եմ, մերժվում եմ: Համայնքապետին եմ դիմում, ասում ա` ես ի՞նչ կարամ անեմ: Իրա աշխատանքի բնույթը, ես չգիտեմ էլ, ինչո՞ւմն ա կայանում: Եթե ես իր փոխարեն լինեի, էլի մի բան կանեի»,- մարզպետին իր բողոքը հայտնեց Ախթալա համայնքի բնակիչ Կարինե Ներկարարայանը, ով ընդունելության էր եկել իր հաշմանդամ քրոջ հետ: 

«Իրեն առաջարկե՞լ եք՝ Ձեզ որտեղ տեղավորի աշխատանքի»,- դիմողին հարցրեց մարզպետը: 

«Օրինակ ես մանկապարտեզը նշում եմ, ասում եմ՝ մանկապարտեզում կա ծեր կին, արդեն ութսունքանի տարեկան, ասում եմ՝ ի՞նչ կլինի՝ նրա փոխարեն ինձ վերցնեք աշխատանքի: Ասում է` տենց հրաման չկա: Բայց ես էն գիտեմ, որ էդ կնիկն ամեն օր հետները մտնում ա, հետները դուրս է գալիս մանկապարտեզից:

Լեռնահարստացման ֆաբրիկայում 100 հատ դիմում ունեմ գրած, ոչ մի հատին ընթացք չի տրվում, ինձանից հետ 100 հոգու ընդունել են: Չգիտեմ, իրոք չգիտեմ, պարոն մարզպետ, ի՞նչ անեմ: Ես մտածել եմ, որ Դուք, որպես նոր մարզպետ, միգուցե կարողանաք ինձ համար որևէ բան անել: Տանը կա 2 հաշմանդամ, մենք ապրում ենք  հաշմանդամների հաշվին»,- ասաց  գործազուրկ կինը:   

Կարինե Ներկարարյանը մասնագիտությամբ բուժքույր է: 

«Կարո՞ղ է Դուք որակյալ բուժքույր չեք»,- հարցրեց մարզպետ: 

«30 տարի և ծննդատանը, և թերապևտ, և մյուս բաժանմունքներում բուժքույր եմ աշխատել և որակյալ եմ եղել, հիմա որակյալ չե՞մ»,- պատասխանեց Կարինե Ներկարարյանը:  

«Լավ, քանի որ մանկապարտեզում բուժքրոջ հաստիք չկա, իսկ մասնագիտական առումով Դուք չեք կարող դաստիարակ աշխատել,  բժշկական ամբուլուլատորիայում էլ նույնպես Ձեր մասնագիտությամբ աշխատատեղ չկա, ես կպայմանավորվեմ Ախթալայի ԼՀԿ-ի ղեկավարության հետ, Ձեզ կընդառաջենք»,- ասաց մարզպետը: 

Ալավերդի քաղաքի Սպանդարյան փողոցի բնակիչ Նիկոլայ Գրիգորյանը մարզպետին հայտնեց, որ օրերս անդամահատել են նաեւ իր կնոջ 2-րդ ոտքը. «Ուժ չունեմ պահելու, պարոն մարզպետ, թոշակս 36 հազար դրամ է: Լրիվ մեր եկամուտները դեղերի փող ենք տալիս: Տեղս նեղ ա: Դրամական օգնություն եմ խնդրում»,- ասաց Նիկոլայ Գրիգորյանը: 

«Մի հատ արագ-արագ դիմում ես գրում, և Ձեզ կօգնենք»,- դիմողին պատասխանեց  մարզպետը: 

Ալավերդի քաղաքի Դեբեդ թաղամասի 3/27 տան բնակիչ Գոհար Եպիսկոպոսյանը մարզպետին հայտնեց, որ 7 տարի է՝ հիվանդ է, երիկամներից մեկը՝ հեռացված: Այդ տարիներին նա հիվանդության կարգից օգտվել է և թոշակ ստացել: Սակայն այս տարի թիվ 3 բժշկասոցիալական փորձաքննական հանձնաժողովը նրան զրկել է  հաշմանդամության կարգից: Հիվանդը հայտնեց, որ սոցիալապես շատ ծանր վիճակում է: Խնդրում էր մարզպետին աջակցել իր հիվանդության կարգը վերականգնելու հարցում: 

Ալավերդու քաղաքապետ Արտավազդ Վարոսյանը մարզպետին դիմողի պահանջի հետ կապված տվեց լրացուցիչ տեղեկատվություն. «Բժշկասոցիալական հանձնաժողովը հիվանդության կարգ նշանակելու համար հիվանդից պահանջում է գնալ Երևան և մեկ շաբաթ պառկել հիվանդանոցում, այսինքն՝ հանձնաժողովում ոչ մեկը չի ժխտում, որ նման հիվանդության համար հիվանդության կարգ է հասնում, բայց երրո՞րդ, երկրո՞րդ, թե՞ առաջին կարգ, դա պարզվելու է բժշկական ուսումնասիրության արդյունքներից ելնելով: Բայց ստացիոնար բուժումն արժե որոշակի գումար: Ես նրան առաջարկել եմ՝ քանի որ տղան զինվորական ծառայող է, կարող է զեղչերով ստանալ այդ բուժումը»: 

Ալավերդու բժշկական կենտրոնի տնօրեն Ստեփան Մոսինյանի պարզաբանմամբ՝ հիվանդը պետք է իր առողջական վիճակի մասին բժշկասոցիալական հանձաժողովին տեղեկանք ներկայացնի հանրապետության ուրոլոգիական կենտրոնից:  

«Այս խնդիրը բժշկասոցիալական հանձնաժողովի կողմից հաճախ է դրվում»,- ասաց Ալավերդու քաղաքապետը: 

Պարզվեց՝ հիվանդին հաշմանդամության կարգից բժշկասոցիալական հանձնաժողովն ընդհանրապես զրկել է. «Եթե գնամ հիվանդանոցում պառկեմ, պոչկես գա՞լ տի տեղն ընկնի: Ինձ հիմա շատ թանկ դեղեր են նշանակել, ես ինչպե՞ս առնեմ այդ դեղերը»,- նեղսրտած ասաց հիվանդը: 

«Եթե հիվանդության կարգը պարտադրում է, որ Դուք պետք է հիվանդանոցում պառկեք, մենք այդ հիվանդանոցին միջնորդագիր կգրենք և կխնդրենք, որ Դուք գնաք պետպատվերով պառկեք, և Ձեր հիվանդության թղթերով գաք ներկայանաք բժշկասոցիալական հանձնաժողովին»,- ասաց մարզպետը:  

Ալավերդի քաղաքի բնակիչ Մանյակ Վանյանը մարզպետին խնդրում էր աջակցել պետպատվերով իր բուժման և զինվորական ծառայությունից զորակոչված տղային աշխատանքի տեղավորելու հարցում: Մարզպետը պետպատվերով բուժման համար քաղաքացուն ասաց, որ իր անունով դիմում գրի, իսկ ծառայությունից վերադարձած որդու համար խոստացավ աշխատանքի տեղավորել Թեղուտի հանքավայրում: 

Ալավերդի քաղաքի բնակիչ Սուսաննա Բաղդասարյանն էլ մարզպետին հայտնեց, որ 2008թ.-ին «Արմենիան Քափըր Փրոգրամ» ընկերության կողմից Ալավերդու հանքավայրը փակելուց հետո աշխատանքից զրկվել է: Նա հանքում աշխատելիս ընկերության երաշխավորությամբ վարկ է վերցրել, որը չի հասցրել մարել: Ներկայումս 91 հազար դրամից վարկի գումարը դարձել է 221 հազար դրամ: Սուսաննան կանգնել է փաստի առաջ: Բանկը դատի է տվել վարկառուին, հոկտեմբերի 26-ին Լոռու մարզի ընդհանուր իրավասության դատարանի Ալավերդու նստավայրում պետք է տեղի ունենա առաջին նիստը: Նա մարզպետից աշխատանք էր խնդրում, որպեսզի կարողանա շուտափույթ փակել վարկը: Արթուր Նալբանդյանը նրան խոստացավ աշխատանքի տեղավորել «Թեղուտ» ՓԲԸ-ում:

Ընդհանուր առմամբ, մարզպետի ընդունելությանը ներկայացան 13 քաղաքացիներ: Ընդունելությունից հետո, պատասխանելով լրագրողների հարցերին, մարզպետն ասաց. «Պետք է ասեմ, որ մարզի բոլոր համայնքներում իմ ընդունելություններին քաղաքացիների պահանջները գրեթե նույնն են: Ինձ ուղղված հարցերի 90 տոկոսը սոցիալական բնույթի են: Միայն Ալավերդի քաղաքում չէ սոցիալական վիճակը լարված»:   

Արթուր Նալբանդյանն ասաց,  որ մարզի զարգացման քառամյա ծրագրով՝   Թումանյանի տարածաշրջանի բնակչության աշխատատեղերի լուծման խնդիրը կապվում է հանքավայրի շահագործման հետ: Նա համոզված է, որ հանքավայրի շահագործումից հետո ալավերդցիներն ու հարևան համայնքերի բնակիչները աշխատանքի խնդիր չեն ունենա:   

Աշխատատեղերի ստեղծման լավագույն ճանապարհներից մեկը մանր ու միջին ձեռնարկատիրության զարգացումն է: «Հետքի» հարցին, թե Լոռու մարզպետարանի կողմից ի՞նչ է արվում մարզում մանր ու միջին ձեռնարկատիրության զարգացման համար, Արթուր Նալբանդյանն ասաց, որ համայնքներին տրվող լիազորությյունների մեջ մանր ու միջին բիզնեսի զարգացման մեջ այդքան էլ մեծ գործառույթներ չկան: Նրանք ընդամենը կարող են աջակցել: Փոքր ու միջին բիզնեսի զարգացումը կապվում  է ՀՀ կառավարության կողմից իրականացվող ծրագրերի հետ: Ըստ մարզպետի՝  կառավարությունը վերջին տարիներին շատ լուրջ ուշադրություն է դարձնում մանր ու միջին բիզնեսի զարգացմանը: 

Այս կապակցությամբ մարզպետը նշեց, որ մանր ու միջին բիզնեսի մարդկանց ավելի շատ մտահոգող ստուգումների կարգը հստակեցված է՝ թե որ կազմակերպությունն ունի ստուգումներ անցկացնելու իրավունք և տարվա մեջ քանի  անգամ:    

«Հետքի» հարցին, թե քաղաքացիների դիմում-բողոքների հետ կապված աշխատանքներում մարզպետարանի և համայնքապետարանների համապատասխան ծառայությունների գործունեության որակն արդյոք չի՞ նպաստում բնակչության սոցիալական վիճակի սրմանը, Արթուր Նալբանդյանը պատասխանեց. «Իմ պաշտոնավարման հենց առաջին օրվանից զգացել եմ, որ այդ խնդիրներն ունենք թե համայնքներում, թե մարզպետարանում: Հատկապես մարզպետարանի այն վարչություններում, որոնք շփվումեն բնակչության հետ, և կան լուրջ դժգոհություններ, մենք այդ վարչություններում արդեն ունենք թեժ գծեր: Թեժ գծեր արդեն տեղադրված են առողջապահության և կրթության ոլորտի համար: Այդ մասին տեղեկացված են մարզի բոլոր լրատվամիջոցները: Մարզպետարանում պատրաստ ենք անմիջապես արձագանքել քաղաքցիների բողոքներին»: