Սա Գյումրու քաղաքապետ Վարդան Ղուկասյանի ավագ եղբոր՝ Գևորգ Ղուկասյանի ապարանքներից մեկն է, որը քաղաքի կենտրոնում՝ «կալբասի սադ» կոչվող այգում, հայտնվեց մոտ 4 տարի առաջ կռվով-դավով ու ծառահատումներով: Բնակիչներից մեկի բողոքով կանաչ գոտին առևտրի կենտրոնի վերածելու համար անցած տարի նույնիսկ քրեական գործ հարուցվեց քաղաքապետի եղբոր դեմ:

Բայց արի ու տես, որ այսօր, Գյումրու օրվա հանդիսավոր տոնակատարության առթիվ, քաղաքապետ Ղուկասյանը այդ նույն կառույցի ժապավենը կտրելու համար մայրաքաղաքից նախարարների և այլ բարձրաստիճան պաշտոնյաների է հրավիրել:

Փաստորեն, Ղուկասյանները, որոնք իրենց բիզնեսն են ծաղկեցնում քաղաքի կենտրոնում մանուկների համար հիմնված խաղասրահով ու մանկական սրճարանով, բավականին մեծ գումարներ են աշխատում և սա շռայլ նվեր են համարում գյումրեցիների համար, իսկ կառավարական հյուրերին էլ փորձում են համոզել, որ իրենց օբյեկտը հասարակական մեծ նշանակության ունեցող, ասենք՝ «Կումայրի» արգելոցին հավասար, թանկարժեք կառույց է, իսկը Գյումրվա զարդ: