Այսօր կառավարությունում տեղի է ունեցել Կայուն զարգացման ազգային խորհրդի հերթական նիստը, որը վարել է վարչապետ, խորհրդի նախագահ Տիգրան Սարգսյանը:

Օրակարգի առաջին հարցով խորհրդի քարտուղար, «Հանուն մարդկային կայուն զարգացման ասոցիացիա» ՀԿ նախագահ Կարինե Դանիելյանը հանդես է եկել ՄԱԿ-ի «Ռիո+20» համաշխարհային գործընթացի արդի բնութագրի և այդ գործընթացին Հայաստանի մասնակցության մասին զեկույցով:

Մասնավորապես, նա անդրադարձել է 2012թ. Ռիո-դե-Ժանեյրոյում կազմակերպվելիք Կայուն զարգացման համաշխարհային գագաթաժողովի խնդիրներին և քննարկվելիք թեմաներին, ինչպես նաև գագաթաժողովին Հայաստանի մասնակցությանն առնչվող հարցերին: Իր հերթին ՀՀ արտաքին գործերի նախարարության միջազգային կազմակերպությունների վարչության պետ Վահրամ Կաժոյանը զեկուցել է 2011թ. փետրվարի 28-մարտի 4-ը Նյու Յորքում կայացած ՄԱԿ-ի Կայուն զարգացման հանձնաժողովում արծարծված հարցերի, ընդունված առաջարկությունների և եզրակացությունների վերաբերյալ:

Զեկուցողները կարևորել են ՀՀ «Ռիո+20» գործունեության ծրագրի մշակումը: Հարցի առնչությամբ կառավարության ղեկավարը հանձնարարել է ձևավորել միջգերատեսչական հանձնաժողով, որը կզբաղվի համաշխարհային, տարածաշրջանային, ազգային և տեղական մակարդակներում Հայաստանի գործողությունների ծրագրի մշակմամբ և դրա իրականացման վերահսկողությամբ: 

Խորհրդին է ներկայացվել ՀՀ կլիմայի փոփոխության երկրորդ ազգային հաղորդագրությունը (ԵԱՀ) Կլիմայի փոփոխության մասին ՄԱԿ-ի շրջանակային կոնվենցիայի համակարգող Արամ Գաբրիելյանը զեկուցել է ՀՀ տնտեսության տարբեր ճյուղերի համար կլիմայի փոփոխության հիմնական մարտահրավերների մասին և անդրադարձել կլիմայի փոփոխության հարմարվողականության ուղղությամբ անհրաժեշտ միջոցառումներին: Խորհուրդը հավանության է արժանացրել առաջարկվող միջոցառումների ցանկը` արձանագրելով, որ դրանք կներառվեն ՀՀ բնապահպանության նախարարության գործառույթներում: 

Հաջորդիվ ծավալվել է մտքերի փոխանակություն, որի ընթացքում, ինչպես հայտնում են Կառավարության մամլո ծառայությունից, քննարկվել են նիստի մասնակիցների կարծիքներն ու տեսակետները՝ զեկուցումներում բարձրացված խնդիրների շուրջ։